Tímarnir breytast og mennirnir með. Sem dæmi er hugmyndin um vinnu frá 9-17 að verða barns síns tíma, ef marka má helstu hneigðir (e. trends) í fjarvinnu fyrir árið 2024, að mati Forbes tímaritsins. Drifkrafturinn á bak við slíka hugarfarsbreytingu er sögð tækni. Þá hefur öldrun þjóða og aukinn skilningur á umhverfisþáttum einnig áhrif.
Í greininni segir að árið 2024 muni hugmyndir fólks um vinnutíma taka enn hraðari breytingum og má það einkum rekja til aukinnar notkunar á gervigreind. Notkun á gervigreind hefur um hríð verið fyrst og fremst í notkun í hátæknifyrirtækjum en nú munum við sjá notkun hennar færast yfir í aðrar atvinnugreinar og gjörbreyta viðhorfum sem hafa verið við lýði um áratugi.
Gervigreind er líklega stærsta breytingin. Því hefur verið haldið fram að hún muni ekki taka yfir störf fólks heldur frekar að fólk sem geti notað gervigreind muni taka yfir störf þeirra sem munu ekki geta nýtt sér hana. Lausnir til notkunar á gervigreind hafa þróast hratt og geta nú aukið skilvirkni í nánast hvaða starfi sem er. Hins vegar er mikilvægt að átta sig á takmörkunum gervigreindar; hvar hún endar og hvar mannleg sköpunargáfa, samúð og nýsköpun tekur við.
Eitt af því sem breyttist með COVID-19 var fjarvinna. Margir telja að fjarvinna geti skapað aukið jafnvægi milli vinnu og einkalífs og stuðlað að auknum afköstum starfsfólks, án þess að sóa tíma og fjármunum í ferðum til og frá vinnu. Fleiri munu velja blandaða vinnu (e. Hybrid Work) árið 2024 og eiga þess kost á að blanda saman teymisvinnu eða fjarvinnu eftir því sem hentar.
Margir telja að sjálfbærni sé lykilatriði hvað varðar vinnu framtíðarinnar; hvernig draga megi úr áhrifum okkar á umhverfið. Til þess að svo sé hægt þarf að endurskoða marga hluti atvinnulífsins, að mati Forbes, allt frá því hvar við vinnum, innleiðingu ferla, hvernig draga má úr sóun og aukna endurvinnslu og endurnýtingu.
Nú hafa gögn áhrif á alla þætti vinnunnar; allt frá framleiðnimælingum til upplýsinga sem notaðar eru til að taka betri ákvarðanir og innleiða skilvirkari ferla. Þú þarft ekkert að vera einhver sérfræðingur í gagnadrifnum kerfum eða lausnum heldur miklu frekar skilja hvernig gögn geta aðstoðað þig og tryggt yfirsýn yfir verkefni dagsins. Um leið skiptir máli að geta nýtt sér lausnir sem auðvelda vinnuna, eins og til dæmis Excel.
Staðreyndin er sú að vestrænar þjóðir eldast, flutningar fólks milli landa aukast og stjórnendur horfa í auknum mæli á fjölbreytileika í starfsliði sínu. Þessar breytingar fela í sér að hefðbundið stigveldi og hugmyndir fyrra ára eru að mörgu leyti komnar út um gluggann, að sögn Forbes. Aukin áhersla er á jafnlaunastefnu og þættir eins og aldur, kynþáttur eða menntunarstig verður minni hindrun í framþróun. Þeir sem eru sveigjanlegir fyrir slíkum breytingum munu ekki líða verkefnaskort í framtíðinni.
