Nokkur Evrópuríki tilkynntu í síðustu viku að þau séu tilbúin til að annast þjálfun úkraínskra hermanna á F-16 orustuþotur. Joe Biden, Bandaríkjaforseti, tilkynnti einnig í síðustu viku að Bandaríkin styðji þetta. Hann gaf einnig grænt ljós á að Úkraína fái F-16 orustuþotur á einhverjum tímapunkti.

Þjálfun flugmanna er auðvitað eitthvað sem verður að ljúka áður en hægt er að láta Úkraínumenn fá F-16 vélar. Ef svo fer að Vesturlönd láti þeim slíkar vélar í té, þá verður það mjög stór vendipunktur í stríðinu.

Þetta er mat Jens Wenzel Kristoffersen, sérfræðings hjá Center for Militære Studier í Danmörku. Í samtali við TV2 sagði hann að þetta muni ráða úrslitum í stríðinu þegar horft sé til langs tíma.

En hann benti um leið á að þeir fái ekki vélarnar bara allt í einu, þetta verði langt ferli og því fylgi stórt verkefni hvað varðar viðhald vélanna og sjá þeim fyrir nauðsynlegum skotfærum og eldsneyti.

„Maður gefur ekki bara F-16 flugvélar og heldur að þá muni allt ganga vel. Þetta er risastórt verkefni sem tekur tíma,“ sagði hann. Hann sagðist telja að það muni taka fjóra til sex mánuði að þjálfa úkraínsku hermennina.

Hann sagði að Úkraínumenn hafi vantað F-16 vélar allt frá upphafi stríðsins: „Yfirráð í lofti eru mikilvæg til að landherinn geti sótt fram. Þetta er það sem vantar til að Úkraínumenn geti náð árangri. Þetta mun breyta stríðinu á afgerandi hátt fyrir Úkraínu.“