Guðni Th. Jóhannesson, forseti Íslands, heimsótti í morgun Grindavík ásamt Elizu Reid forsetafrú en skömmu eftir heimsóknina byrjaði eldgosið á Reykjanesskaganum.

Í færslu sem Guðni birti á Facebook-síðu sinni segir hann frá heimsókninni. „Vonandi valda umbrotin ekki usla eða skemmdum,“ segir hann í upphafi færslunnar.

„Í morgun héldum við Eliza til Grindavíkur, hittum þar Fannar Jónasson bæjarstjóra og bæjarfulltrúa, auk ungra sem aldinna víða í bænum. Við litum meðal annars við á stöðum þar sem tjón varð vegna skjálftanna nýverið, á Bryggjunni og í Blómakoti, fylgdumst með löndun og fengum okkur plokkfisk í Víðihlíð, dvalarheimili aldraðra.“

Þá segir Guðni að heimamenn frá óskum sínum varðandi skjálftana og gosið sem þá var ekki hafið. „Víða heyrðum við þá von að skjálftahrinunni væri lokið en ef gjósa þyrfti væri best að það gerðist sem fyrst og fjarri byggð eins og síðast,“ segir hann.

„Æðruleysi einkenndi allt heimafólk. Nú vonum við áfram að allt fari vel. Við hjónin þökkum Grindvíkingum fyrir gestrisni þeirra. Við þökkum þeim sömuleiðis sem fylgjast nú grannt með gangi mála á gosstöðvum og vinna að því að tryggja öryggi okkar allra. Förum að öllu með gát.“