„Ég óttast að stríðið í Úkraínu fari úr böndunum og breiðist út og verði að stórstyrjöld á milli NATO og Rússlands. Þetta er mjög alvarlega staða og það eru örlagatímar í Evrópu og þar með fyrir Noreg. Ef þetta fer úr böndunum, getur þetta endað skelfilega,“ sagði Norðmaðurinn Stoltenberg.
NATO gegnir stóru hlutverki í stríðinu í Úkraínu því bandalagið veitir Úkraínu hernaðarlega aðstoð, útvegar vopn og skotfæri og annast þjálfun úkraínskra hermanna.
Áður en Rússar réðust inn í Úkraínu kröfðust þeir tryggingar frá NATO um að Úkraínu myndi aldrei fá að ganga í NATO því það telja þeir ógna öryggi sínu. NATO hefur ekki viljað veita Rússum tryggingu fyrir þessu.
Skömmu áður en Rússar réðust inn í Úkraínu þann 24. febrúar ræddu Stoltenberg og Pútín saman í Brussel. Þá lagði Stoltenberg fram tillögu sem var ætlað að koma í veg fyrir stríð. „En á einhverjum tímapunkti koma samtöl ekki lengur að gagni. Pútín haðfi ákveðið að beita valdi og ofbeldi,“ sagði Stoltenberg í þættinum.
Stoltenberg var forsætisráðherra Noregs í byrjun aldarinnar og á sama tíma var Pútín nýkjörinn forseti Rússlands. „Þegar hann var nýkjörinn forseti árið 2000 var hann leitandi og vildi samstarf við Vesturlönd. Pútín eftir það er miklu árásargjarnari og segir sögur sem eru ekki sannar,“ sagði Stoltenberg.
