Í október voru brottfarir Íslendinga frá landinu 72.000 og hafa aldrei mælst fleiri í október. Mánuðurinn var því metmánuður hvað varðar utanlandsferðir landsmanna og því óhætt að segja að mikil ferðagleði ríki.

Fréttablaðið skýrir frá þessu í dag og hefur eftir Jóhannesi Þór Skúlasyni, framkvæmdastjóra Samtaka ferðaþjónustunnar, að þetta staðfesti að Íslendingar hagi sér eins og aðrar þjóðir og að ferðaviljinn hafi verið orðinn mikill.

Tæplega 159.000 brottfarir voru frá Keflavíkurflugvelli í október og var þetta fjórði fjölmennasti októbermánuðurinn frá því að mælingar hófust.

Bandaríkjamenn eru fjölmennastir þeirra ferðamanna sem koma til landsins þessa mánuðina en í október voru þeir þriðjungur allra ferðamanna.

Jóhannes sagði að eftirspurnin hafi verið meiri á árinu en reiknað var með.

Hægt er að lesa nánar um málið í Fréttablaðinu í dag.