Svona hefst afsökunarbeiðni Samherja sem birtist á heilsíðu í Fréttablaðinu og Morgunblaðinu í dag. Í afsökunarbeiðninni, sem undirrituð er af Þorsteini Má Baldvinssyni forstjóra Samherja, er það viðurkennt að ámælisverðir viðskiptahættir hafi fengið að viðgangast í starfsemi útgerðar Samherja í Namibíu.
„Veikleikar voru í stjórnskipulagi og lausatök sem ekki áttu að líðast. Við brugðumst ekki við eins og okkur bar. Þetta hefur valdið uppnámi hjá starfsfólki okkar, fjölskyldum, vinum, samstarfs- aðilum, viðskiptavinum og víða í samfélaginu. Við hörmum þetta og biðjumst einlæglega afsökunar.“
Þorsteinn Már biðst einnig afsökunar sjálfur. Það geri ég persónulega sem forstjóri og einnig fyrir hönd félagsins sem ætíð hefur haft vönduð vinnubrögð að leiðarljósi í allri sinni starfsemi,“ segir í afsökunarbeiðninni.
„Við viljum ekki láta við það sitja að biðjast afsökunar heldur draga lærdóm af þessum mistökum og tryggja að ekkert slíkt gerist aftur. Í því skyni höfum við gripið til viðamikilla ráðstafana. Frá upphafi hefur það verið meginmarkmið okkar að framleiða hágæða sjávar- afurðir í sátt við umhverfið með ríka áherslu á sjálfbærni og góða umgengni við auðlindir sjávar. Við viljum halda því áfram og horfa fram á veginn. Mistök okkar í Namibíu eru ekki síst okkur sjálfum mikil vonbrigði. Við munum ekki láta slíkt henda aftur.“
Á vef Samherja birtist einnig í morgun ítarlegri yfirlýsing en þar virðist skuldinni alfarið vera skellt á fyrrverandi framkvæmdastjóra yfir félögunum í Namibíu. Sá framkvæmdastjóri er uppljóstrarinn Jóhannes Stefánsson. Í yfirlýsingunni segir Samherji að Jóhannes hafi tekið úr „verulegar fjárhæðir í reiðufé af reikningum félaganna“ og að það hafi verið gert án skýringa.
„Þá er það niðurstaða skýrslunnar að fyrrverandi framkvæmdastjóri yfir félögunum í Namibíu hafi tekið út verulegar fjárhæðir í reiðufé af reikningum félaganna, án nokkurra eða viðhlítandi skýringa. Margt bendir til þess að peningaúttektirnar hafi verið notaðar með óréttmætum hætti. Samherji vekur athygli á því að fyrir liggur viðurkenning framkvæmdastjórans fyrrverandi á þessari háttsemi og að því er virðist margs konar annarri brotastarfsemi á hans vegum þar sem félögum Samherja var beitt.“
Í yfirlýsingunni segir Samherji að smám saman hafi „starfsmönnum tekist að ná tökum á starfseminni í Namibíu“. Þá segir einnig að starfsmennirnir hafi reynt að skilja og bæta úr því sem miður fór en að lokum hafi starfsemin verið lögð niður.
Aftur er skuldinni svo skellt á Jóhannes en í yfirlýsingunni segir að hann sé sá eini af starfsmönnum fyrirtækisins sem gerði eitthvað saknæmt í störfum sínum.
„Það er hins vegar ljóst að þá starfshætti, sem hér hafa verið raktir, hefði átt að stöðva mun fyrr. Þeir voru því miður látnir viðgangast allt of lengi. Samherji áréttar að ekki verður séð að aðrir starfsmenn en framkvæmdastjórinn fyrrverandi hafi bakað sér saknæma ábyrgð í störfum sínum.“