Ákveðið hefur verið að prentútgáfa DV fari í tímabundið útgáfuhlé. Helsti áhrifaþáttur þar er heimsfaraldurinn sem hefur gert auglýsingasölu erfiða og hamlað útgáfu með ýmsum hætti.

Á meðan á útgáfuhléi stendur verður settur aukinn kraftur í vefmiðilinn DV.is sem er einn sá stærsti hérlendis með 130. þúsund lesendur dag hvern.*

Helgarviðtal beint í innhólfið

Helgarviðtal DV mun birtast alla föstudaga á vefnum auk þess sem það verður sent þeim er skrá sig á póstlista DV og kjósa að lesa umbrotna útgáfu rafrænt, án endurgjalds. Mikið verður lagt upp úr myndatöku og áhugaverðum viðmælendum líkt og áður. Greiðsluseðlar til áskrifenda fyrir apríl verða felldir niður.

Nýjungar á vefnum verða kynntar á næstu vikum. Tobba Marinósdóttir ritstjóri DV, sagði starfi sínu lausu í lok febrúar en starfar áfram hjá Torgi og mun fylgja þessum breytingum úr hlaði og tryggja að aukinn krafur verði settur í DV.is.

*Samkv. mælingum Gallup