Leikarinn Hilmir Snær Guðnason segir að honum finnist #metoo umræðan á tímabilum hafa farið út í öfgar en að byltingar þurfi að fara yfir strikið svo að mark sé á þeim tekið og af þeim sé lært.
„Mér finnst skrítið að dæma menn án þess að vita hvað stendur að baki og er hlynntur dómstólaleiðinni. Það á að trúa þolendum en það má ekki dæma áður en búið er að sanna eitthvað,“ segir Hilmir í samtali við Fréttablaðið í dag þar sem hann er í forsíðuviðtali.
Spurður hvort hann upplifi misrétti milli kynja í leiklistinni í ljósi umræðunnar sem uppi hefur verið í samfélaginu undanfarið, líkt og #metoo, segir hann ójafnrétti að finna alls staðar.
„Maður hefur alltaf séð þetta alls staðar í kringum sig en samt var ég steinhissa á hvaða stig umræðan fór,“ segir Hilmir.
„Ég upplifði það ekki þannig að þetta væri meira innan leikhússins en annars staðar og það kom mér á óvart.“
„Það eru manneskjur á bak við alla og ef fólk tekur ábyrgð, þiggur hjálp og gengst við því sem það hefur gert þá verður það að eiga afturkvæmt í samfélagið en ekki vera útskúfað að eilífu,“ segir hann.
„En í grunninn er þetta ekkert flókið, lykillinn er bara að ef fólk hegðar sér ekki svona þá koma þessi mál ekki upp,“ segir hann yfirvegaður.
Hilmir Snær fer með aðalhlutverk í kvikmyndinni Dýrið sem var frumsýnd í gær ásamt sænsku stórleikkonunni Noomi Rapace. Myndin fjallar um bændahjónin Maríu og Ingvar sem búa í afskekktum dal. Þegar dularfull vera fæðist á bænum ákveða hjónin að ala hana upp sem sína eigin.
Helgarviðtal Fréttablaðsins við Hilmi Snæ má lesa hér.