Í gær úrskurðaði Landsréttur mann í gæsluvarðhald sem er grunaður um fjölda afbrota. Flest þeirra varða þjófnað og innbrot, en auk þess er hann grunaður um fjársvik, skjalafals, ofbeldi, eignaspjöll, hótanir, vörslu fíkniefna og vopnalagabrot. Brotin sem hann er grunaður um eru þrjátíu talsins.
Maðurinn hefur hlotið 5 dóma frá árinu 2014, síðast í fyrra þegar hann fékk 10 mánaða fangelsisdóm fyrir ýmis brot, og þar á undan tveggja ára fangelsisdóm fyrir rán og önnur brot.
Líkt og áður segir er hann nú grunaður um þrjátíu brot, það elsta frá því í janúar á þessu ári, en það nýjasta varðar atvik sem átti sér stað í þessum mánuði. Langflest brotanna áttu sér stað í maí, júní og júlí.
Hann er meðal annars talinn hafa stolið fötum úr verslun, stolið 30 þúsund krónum úr afgreiðslukassa á pizzastað, brotist inn á hótelherbergi og stolið þaðan munum, stolið matvælum úr verslun, hrifsað heyrnartól af aðila, stolið rafhlaupahjóli, og brotist inn á rakarastofu og stolið rakvélum og skærum. Í sumum málunum játar hann sök, en í öðrum neitar hann.
Brotinn varða þó ekki bara þjófnað, heldur er maðurinn einnig grunaður um líkamsárás þann 30. maí, með því að veitast með ofbeldi að einstaklingi. Hann neitar sök, en viðurkennir að hafa verið á vettvangi.
Í öðru máli er maðurinn grunaður um að brjótast inn í bifreið og sofna þar. Síðan hafi lögregla komið á vettvang og þá hafi hann sýnt ofbeldisfulla hegðun við handtöku. Í enn einu málinu er hann grunaður um tilraun til að brjótast inn í hús. Þar hafi hann sparkað í hurð og verið vopnaður kylfu.
Þann 10. apríl er hann grunaður um að veitast að einstaklingi með hótunum og ofbeldi ásamt öðrum aðila, til að mynda með því að slá brotaþola. Þegar lögregla handtók hann er hann sagður hafa verið í mjög annarlegu ástandi. Hann neitar sök í því máli.
Líkt og áður segir var maðurinn úrskurðaður í gæsluvarðhald í gær. Í úrskurðinum segir að yfirgnæfandi líkur séu því að hann muni „halda áfram brotastarfsemi fari hann frjáls ferða sinna“.
