Eftir miklar vangaveltur undanfarna daga hefur það nú verið staðfest að Þjóðhátíð 2021 er frestað. Þetta kemur fram í tilkynningu sem Hörður Orri Grettisson, formaður Þjóðhátíðarnefndar ÍBV, sendi út. Þrátt fyrir að hátíðin verði ekki haldin um Verslunarmannahelgina er það enn á borðinu að hún verði haldin síðar í sumar eða í haust. Enn er haldið í vonina um Þjóðhátíð í Vestmannaeyjum árið 2021 en ákvörðun um það hvort hátíðin verði haldin síðar á árinu mun liggja fyrir í síðasta lagi þann 14. ágúst.
Samkvæmt tilkynningunni er verið að vinna að því að útbúa kerfi til að endurgreiða miða og verður það kynnt í byrjun næsta mánaðar þegar endurgreiðslur hefjast. Þeir sem eiga miða á Þjóðhátíð geta valið þrjá möguleika: Fá miðann endurgreiddan, styrkja ÍBV um andvirði miðans eða að flytja miðann yfir á Þjóðhátíð næsta árs.
Fyrr í dag var það tilkynnt að Brekkusöng Þjóðhátíðarinnar verði streymt á sunnudaginn 1. ágúst en það er hann Magnús Kjartan Eyjólfsson sem mun stýra söngnum heim til fólks.