Stjórn fótboltamótsins ReyCup varar fólk við skipulögðu gengi sem herjar á börnin sem keppa á mótinu. Þetta kemur fram í tilkynningu sem hefur verið send á foreldra barna á mótinu og íbúa í nágrenni við mótið, sem haldið er í Laugardal.

Samkvæmt tilkynningunni eru um 10 manns í genginu, á aldrinum 18-20  ára. Óspektir gengisins felst í eggjaárásum, sem það er sagt stunda seint á kvöldin þegar það situr um Laugarnesskóla og Laugarlækjaskóla, þar sem keppendur gista.

Meðlimirnir kasta eggjum í dýnur, ferðtöskur, föt, og aðra muni keppenda, og ekki nóg með það, heldur verða börnin sjálf fyrir „eggjaskothríðinni“.

Fram kemur að lögreglu hafi verið tilkynnt um málið og eru nágrannar hvattir til að vera á varðbergi og tilkynna til lögreglu verði þeir varir við eitthvað grunsamlegt.

Tilkynningin er eftirfarandi:

„Upp hefur komið virkilega slæm og leiðinleg staða á ReyCup í Laugarnesskóla og Laugarlækjaskóla.

Síðustu tvö kvöld hefur 10 manna gengi setið um skólana um klukkan 22:00-24:00. Þetta gengi er á bíl og er skipulagt í sinni starfsemi.

Þeir eru á bilinu 18-20 ára og hafa eyðilagt marga hluti. Þeir eru að kasta eggjum inn í skólana og á þá sem eru að lenda á ferðatöskum, dýnum og fötum. Það versta er að börnin hafa einnig orðið fyrir þessari eggjaskotríð.

Lögreglu hefur verið tilkynnt um málið og hafa upptökur farið til hennar þar sem eftirlitsmyndavélar eru á þessum stöðum. Við viljum biðla til ykkar kæru nágrannar að leggjast á árar með okkur að fylgjast með í ykkar nágrenni og tilkynna strax til lögreglu ef þið sjáið til þessara aðila að „störfum“. Lögreglan veit af málinu og er að fylgjast með skólunum. Það ríkir mikil ókyrrð meðal keppenda og foreldra þar sem hópurinn er ógnandi. “