Dómur féll þann 20. júlí í máli stærðfræði- og viðskiptafræðikennara við ónefndan framhaldsskóla hér á landi, sem stefndi ríkinu vegna uppsagnar hans við skólann vorið 2018.
Kennarinn krafðist þess að uppsögnin yrði ógilt og honum yrðu dæmdar þrjár milljónir króna í miskabætur.
Maðurinn var ráðinn til skólans árið 2007 og fastráðinn árið 2010. Við upphaf skólaárs 2017 lá fyrir að aðsókn að tilteknum námsbrautum í skólanum hafði dregist saman með þeim afleiðingum að kennslumagn í stærðfræði og viðskiptagreinum hafði dregist saman. Skólameistari og aðstoðarskólameistari gerðu þá samanburð á fjórum kennurum í stærðfræði, viðskiptagreinum og upplýsingatækni. Lagt var mat á fjóra þætti og niðurstaðan var sú að umræddur kennari fékk lægsta matið, meðal annars í kennslumati nemenda á gæðum kennslu hans.
Kennarinn heldur því fram að skólameistari hafi þegar tekið ákvörðun um að segja sér upp áður en matið á hæfni kennaranna fór fram. Hann hefði kallað sig til fundar í nóvember árið 2017 og hvatt sig til að skoða aðra möguleika en kennslu við skólann.
Þá heldur kennarinn því fram að uppsögn hans hafi ekki verið í samræmi við stjórnsýslulög, samkvæmt þeim hefði ekki skólameistari ekki haft umboð til að segja honum upp störfum án þess að bera ákvörðunina undir skólanefnd.
Þá gerði kennarinn ítarlegar athugasemdir við kennaramatið þar sem hann var metinn síst hæfur af kennurunum fjórum.
Skemmst er frá því að segja að héraðsdómur ómerkti meira og minna allan málatilbúnað kennarans. Til dæmis þá fullyrðingu hans að uppsögn hefði verið ákveðin fyrirfram því skólameistari hefði kallað sig á fund í nóvember og hvatt sig til að hugleiða aðra kosti en kennslu við skólann. Gögn málsins sýna að matið á kennurunum fór fram snemma í nóvember og það var komið af stað eða því jafnvel lokið þegar þetta samtal fór fram.
Þá kom enn fremur fram að kennaranum höfðu verið boðnir aðrir kostir, til dæmis skjalavarsla í hálfu starfi og kennsla í hálfu starfi. Þeim tilboðum hafði hann hafnað og því var fullreynt um sáttaleiðir þegar honum var sagt upp.
Kröfur kennarans um að uppsögnin yrði ógilt og miskabætur var því hafnað.