Silja Björk Björnsdóttir, fyrirlesari, rithöfundur og einn þáttastjórnenda hlaðvarpsins Kona er nefnd, á von á kröfubréfi frá lögmanninum Vilhjálmi Vilhjálmssyni fyrir hönd tónlistarmannsins Ingólfs Þórarinssonar, sem yfirleitt er kallaður Ingó Veðurguð. Þetta kemur fram í frétt Fréttablaðsins en samkvæmt heimildum þeirra varðar bréfið ummæli sem Silja birti á Twitter-síðu sinni í kjölfar þess að hin 5 kröfubréfin voru send út.

Í ummælunum sem um ræðir segir Silja það vera geggjað að milljarðamæringurinn Haraldur Þorleifsson ætli að borga allan málskostnað og miskabætur fyrir þá sem hafa fengið bréf. Silja spyr svo að lokum hvort fólk sé ekki sammála henni um að moka ekki peningum í „nauðgara og barnaníðing“.

Hér fyrir neðan má sjá ummælin sem um ræðir:

„Ókei mér finnst geggjað að Halli bjóðist til að aðstoða þessa kvenskörunga fjárhagslega en….erum við samt ekki ÖLL sammála því að við erum ekki að fara að moka peningum í barnaníðing og nauðgara???“

Silja tjáði sig um málið í samtali við blaðamann Fréttablaðsins í gær. Þar sagðist hún ekki hafa séð kröfubréfið og að henni finnist ummælin vera frekar hlutlaus. „Þetta er sett fram á mjög hlutlausan hátt og enginn er nefndur á nafn nema Halli. Þetta er almennt yfirlýsing um ástandið í þjóðfélaginu og í dómskerfinu frekar en eitthvað annað. Ef einhver aðili hefur tekið þetta til sín persónulega þá verður sá sami að eiga það við sjálfan sig,“ segir hún.

Hinir 5 aðilarnir sem hafa fengið kröfubréf frá Vilhjálmi og Ingólfi eru Erla Dóra Magnúsdóttir, blaðamaður á DV, Kristlín Dís Ingilínardóttir, blaðamaður á Fréttablaðinu, Ólöf Tara Harðardóttir hjá baráttuhópnum Öfgum, Edda Falak áhrifavaldur og Sindri Þór Hilmars- Sigríðarson, markaðsstjóri hjá Tjarnarbíó og aktívisti. Öll eru þau krafin um að draga ummælin sín til baka auk þess að biðjast afsökunar og borga milljónir í skaðabætur.