Breska flugfélagið easyJet og þýsku járnbrautirnar Deutsche Bahn (DB) opnuðu nýja sameiginlega bókunarvél með pomp og prakt á Brandenborgarflugvellinum í Berlín í gær. Viðskiptavinir félaganna tveggja geta nú tengt saman bókanir á jörðu sem á himni í gegnum tækni Dohop sem knýr „Worldwide by easyJet“ kerfið.
Samstarf easyJet og Deutsche Bahn er í takt við þær breytingar sem eru að eiga sér stað innan Evrópu er varða aukna fjárfestingu í járnbrautakerfum álfunnar. Með þessari nýjung verður enn auðveldara að tengja saman bókanir og að ferðast um járnbrautakerfi Þýskalands. Ferðalögin verða einnig sveigjanlegri og sjálfbærari. Íslendingar njóta einnig góðs af þessum nýju tengimöguleikum, þar sem easyJet flýgur til Berlínar frá Keflavík.
Tengingarnar, sem nú eru aðgengilegar í Þýskalandi um Berlín, gera ferðamönnum kleift að heimsækja og bóka ferðir til borga eins og Leipzig, Dresden, Magdeburg, Hannover og Wolfsburg. Með því að sameina lest og flug tengir easyJet saman um fimm milljón manna í nágrenni Berlínar við leiðakerfi sitt og samhliða því, auðveldar ferðamönnum að upplifa borgirnar í nágrenni við Berlín.
„Eftir að hafa flogið í rúmlega 17 ár til Berlínar, tekur easyJet næsta skref og eykur tengingu Brandenborgarflugvallar í Berlín við nærliggjandi sambandsríki. Samstarfið við Deutsche Bahn býður ferðamönnum upp á áreiðanlegar tengingar við allt að 70 áfangastaði um alla Evrópu í gegnum Berlín. Þessi framsýna lausn er næsta skref í átt að sjálfbærum ferðalögum,“ segir Stephan Erler, svæðisstjóri easyJet í Þýskalandi.
„Það er stórt skref fyrir Dohop að tengja saman easyJet og Deutsche Bahn. Við höfum unnið mjög náið með þessum fyrirtækjum sem eru bæði leiðtogar á sviði sjálfbærni í ferðaþjónustu. Þessi nýja lausn er skref í átt að aukinni sjálfbærni í ferðalögum og mun koma til með að móta ferðamáta í framtíðinni. Við erum mjög stolt af lausninni sem er stærsta nýjung Dohop til þessa,“ segir Kristján Guðni Bjarnason, tæknistjóri Dohop.
Samstarf easyJet, Deutsche Bahn og Dohop er fyrsta stafræna “intermodal” tenging sinnar tegundar í heiminum. Kerfin frá Dohop hafa til þessa tengt saman flugfélög á hagkvæman og skilvirkan hátt en markaðurinn og löggjafinn hafa kallað eftir breytingum og easyJet og Deutsche Bahn hafa nú svarað því ákalli með samstarfi sínu við Dohop.
