Sævar Þór Jónsson lögmaður segir að taktíkin sem Villi Vill notast við sem lögmaður Ingólfs Þórarinssonar, Ingós Veðurguðs, sé tilgangslaus og óskiljanleg. Villi Vill hefur sent fimm einstaklingum kröfubréf, ýmist vegna ummæla eða blaðaskrifa, um Ingó Veðurguð.

Forsagan er sú að á TikTok-síðu Öfga birtust 20 nafnlausar sögur um ákveðinn tónlistarmann en aldrei var tekið fram hver þessi tónlistarmaður væri. Hins vegar eiga þeir blaðamenn sem hafa fengið kröfubréf að hafa tengt nafn Ingós við þessar sögur. Blaðamennirnir sem um ræðir eru Kristlín Dís Ingilínardóttir hjá Fréttablaðinu og Erla Dóra Magnúsdóttir hjá DV.

Aðrir sem hafa fengið sent eða munu fá sent kröfubréf eru Sindri Þór Hilmars-Sigríðarson, Edda Falak og Ólöf Tara Harðardóttir. Þau fá bréf fyrir ummæli sem þau skrifuðu á samfélagsmiðlum.

Sævar segir að í öllum svipuðum málum og þessu hefur lögreglan vísað kæru frá og litið svo á að um einkaréttarlegan ágreining sé að ræða. Hann segir að Villi ætti að vita þetta og því sé þetta tilgangslaus taktík.

Ólíklegt er að einstaklingarnir fimm munu greiða Ingó og hafa þau flest nú þegar gefið út að þau láti hann ekki fá krónu úr sínum vasa.