Héraðsdómur Reykjaness dæmdi fyrir helgi Dawid Grynig í tveggja ára fangelsi fyrir stórfellt fíkniefnalagabrot og áfengislagabrot.
Héraðssaksóknari sótti málið fyrir hönd ákæruvaldsins. Í ákærunni kemur fram að Dawid hafi þann 8. apríl verið gripinn með um 38 kíló af fíkniefnum í Hafnarfirði. Hluti efnanna hafði Dawid framleitt sjálfur á staðnum en meðal haldlagðra muna í aðgerð lögreglu var mikið magn tækja og tóla sem hann er sagður hafa nýtt sér við framleiðsluna. Á meðal efnanna voru um 37 kíló af kannabisefnum auk 800 gramma af amfetamíni.
Þá er Dawid dæmdur fyrir að hafa haft 53 lítra af gambra á sama stað og fíkniefnin, í Hafnarfirði, en gambrinn var 14% að áfengisstyrk. Gambri er fenginn með því að láta sykurvatn gerjast þar til það nær hámarksstyrk. Gambrinn er svo eimaður til þess að ná áfenginu úr lausninni. Afurð þessarar framleiðslu er landi.
Tvennt var upphaflega ákært í málinu, en í ljósi skýlausrar játningar Dawids, og orða hans um að hann hafi einn verið að verki var fallið frá ákæru gegn hinum einstaklingnum og Dawid einn sakfelldur.
Kemur fram í dómnum að sakaferill Dawids sé hverfandi, en í ljósi alvarleika brotanna og hve skipulögð og umfangsmikil brotin voru, þótti dómnum ekki tækt að skilorðsbinda refsinguna.
Til viðbótar við tveggja ára fangelsisdóm þarf Dawid að sæta upptöku á fíkniefnunum, tækjunum og tólunum til fíkniefnaframleiðslunnar og 53 lítra af gambra. Til frádráttar fangelsisrefsingunni kemur gæsluvarðhaldið sem Dawid sætti frá 9. apríl að dómsuppkvaðningu fyrir helgi.
