Á fimmtudag í síðustu viku féll í Héraðsdómi Reykjaness dómur yfir spænskri konu vegna aðildar hennar að tilraun til fíkniefnasmygls í desember í fyrra. Mariana var þann 20. desember stöðvuð af tollvörðum í Leifsstöð ásamt kærasta sínum, Jose Ioavaisha Xaire Morales. Reyndist Mariana hafa falið 256 grömm af rótsterku amfetamíni innvortis og í dömubindi í nærfatnaði hennar. Í dóminum segir að kærasti Mariönu, Jose, hafi bókað flugið, greitt fyrir farmiða hennar, pakkað fíkniefnunum og fylgt henni í fluginu.

Í dómnum kemur jafnframt fram að Mariana sé ekki búsett á Íslandi og hafi ekki áður gerst brotleg við lög hér á landi. Þá segir í niðurstöðum dómsins að ljóst sé af gögnum málsins að Mariana sé svokallað burðardýr og hafi ekki komið nálægt skipulagningu á fíkniefnainnflutningnum. Þá er skýlaus játning hennar á hennar aðkomu að smyglinu metin henni til refsilækkunar. „Hins vegar,“ segir í dómnum, „verður einnig tekið tillit til þess að um var að ræða töluvert magn af sterkum fíkniefnum […].“

En sögu þríeykisins er fjarri því lokið, því á morgun fer fram aðalmeðferð í málum samverkamanna Mariönu.

Í ákæru sem DV hefur undir höndum er Jose sagður hafa skipulagt enn stærra smygl daginn áður en þau voru handtekin í Leifsstöð, 19. desember í fyrra, og notað til þess aðra konu sem burðardýr daginn áður.

Er Jose sagður hafa bókað og greitt fyrir flugmiða konunnar til landsins, rétt eins og í tilfelli Mariönu. Við leit tollvarða fundust í farangri konunnar tæp 5 kíló af hassi, rúmar 5 þúsund E-töflur og 100 stykki af LSD. Efnin hafði konan ferjað frá Amsterdam til Íslands með millilendingu í Stokkhólmi.

Þríeykið var fyrst ákært saman en í ljósi játningar Mariönu var mál hennar slitið frá málinu gegn Jose og hinni konunni og dæmt í því máli eitt og sér. Jose og hin konan neita áfram sök og fer aðalmeðferð í þeirra máli fram á morgun.

Héraðssaksóknari, sem sækir málið, krefst þess að dæmt til refsingar og greiðslu alls sakarkostnaðar.