Fréttablaðið skýrir frá þessu í dag og segist hafa heimildir fyrir að megn óánægja sé innan BUGL og að erfiðlega gangi að halda í starfsfólk. Óttast sé að umræða um þetta valdi því að fólk sæki síður um störf á deildinni.
Blaðið hefur eftir Lindu Kristmundsdóttur, framkvæmdastjóra kvenna- og barnasviðs, að BUGL geti ekki keppt við þau kjör sem eru í boði hjá sveitarfélögunum.
„BUGL getur ekki keppt um launasetningu þessara starfsmanna, sem er mjög óheppilegt vegna þess að BUGL er sérfræðistofnun,“
er haft eftir henni.
Í kjölfar umræðu um málefni transteymisins í febrúar sendi Landspítalinn frá sér yfirlýsingu um að unnið yrði að umbótum í samstarfi við ráðuneytið en Fréttablaðið fékk engar upplýsingar um hvað fælist í því samstarfi.
Vandi BUGL er ekki einsdæmi innan spítalans og hefur Fréttablaðið eftir Ástu Bjarnadóttur, framkvæmdastjóra mannauðsmála Landspítalans, að verið sé að skoða mál BUGL.
„Staðan er sú að flest stéttarfélög hafa lokið sínum kjarasamningum í ár og með örfáum undantekningum hefur ekki verið um að ræða viðbætur inn í launahækkanir umfram viðmið Lífskjarasamnings. BUGL er meðal þeirra eininga sem hafa óskað eftir skoðun varðandi möguleikana á bættum kjörum samhliða aukinni reynslu og sérhæfingu starfsfólks,“
er haft eftir henni.
