Tuttugu manns eru núna á biðlista eftir að komast í endurhæfingu á Reykjalundi vegna eftirkasta COVID-19. Er þetta fólk sem glímir við eftirköst af sjúkdómnum mörgum mánuðum eftir að það losnaði við veiruna.

Þetta kom fram í kvöldfréttum RÚV. Stefán Yngvason, framkvæmdastjóri lækninga á Reykjalundi, segir marga vera með skerta starfsgetu eftir að hafa smitast af veirunni. Segir hann öruggt að umsóknum af þessu tagi muni fjölga,.

RÚV ræddi við Sesselju Haukdal Sigurjónsdóttur sem er ein þeirra er glímir við eftirköst af COVID-19. Lýsa einkennin sér meðal annars í þreytu og mikilli mæði. Sesselja segir að þessi hópur sé í mikilli þörf fyrir faglega aðstoð en lítil fagleg aðstoð hafi verið í boði og fólk sé að rembast við að reyna að lækna sig sjálft. Hún segir marga í þessum hópi vera í löngu veikindaleyfi og fólkið sé hrætt því það óttist að verða öryrkjar.