Þeir sem eiga börn vita sem er að þeir myndu gera hvað sem er til að vernda börnin sín. Móðir ein í Bretlandi hefur vakið töluverða athygli vegna myndbands sem birtist af henni þar sem hún lætur ungan dreng heyra það sem lagt hefur son hennar í einelti.
Í frétt Mail Online kemur fram að myndbandið hafi verið tekið í London og var það pilturinn sem fékk reiðilesturinn yfir sig sem tók það og birti. Í raun er óþarfi að hafa mörg orð um orðbragð konunnar en til að gera langa sögu stutta gerir hún piltinum grein fyrir því að hann muni sjá eftir því ef hann leggur hendur á son hennar aftur.
Myndbandið hefur vakið talsverða umræðu á samfélagsmiðlum og sitt sýnist hverjum. Sumir hafa sagt konuna ganga of langt en margir hafa bent á að það sé réttur allra foreldra að vernda börn sín með öllum tiltækum ráðum.
„Hún hefur trúlega kvartað við skólann nokkrum sinnum en ekkert breyst. Ég skil hana vel. Ég er viss um að þessi piltur hafi ekki svo mikið sem horft í áttina að syni hennar eftir þetta,“ segir til að mynda einn.
Myndbandið má sjá hér að neðan:
