Lögreglumenn á Ísafirði náðu að bjarga fjórum út úr húsi í nótt eftir að það byrjaði að loga í sólpalli. Auk þess hafði eldur náð að festast í klæðningu hússins, sem er viðarhús, þegar lögreglumenn sáu reyk stíga upp úr húsinu.
RÚV greinir frá þessu. Lögreglumenn eru sagðir hafa brugðist hratt við, vakið fólkið og haldið eldinum í skefjum þar til slökkvilið kom á vettvang. Á Ísafirði er nú talsverður fjöldi gesta vegna Aldrei fór suður. Nóttin er sögð hafa verið róleg fyrir utan þetta atvik.