„Þessir menn eru ekki að áreita í fyrsta sinn og eru alræmdir“
Nokkrir karlmenn áreittu börn í strætisvagni í Reykjanesbæ í gærkvöldi. Lögreglan var kölluð til en mennirnir eru sakaðir um að hafa reynt að káfa á og kyssa börn í vagninum. Klukkutíma eftir að lögreglan hafði afskipti af mönnunum voru þeir komnir aftur í strætisvagn í bænum þar sem þeir héldu áfram að áreita börn.
Víkurfréttir greindu frá en mikið var rætt um atvikið í lokuðum Facebook hópum fyrir íbúa Reykjanesbæjar í gærkvöldi. Mikill æsingur einkenndi umræðurnar. Þar voru foreldrar sem eiga börn í Reykjanesbæ og tóku strætó eftir klukkan 15 í gær eru beðin um að ræða sérstaklega við börn sín og grennslan fyrir um hvort þau hafi verið áreitt.
Á Facebook er ítrekað talað um kynferðislega áreitni nokkurra manna. Bílstjóri strætisvagnsins segir að mennirnir séu hælisleitendur frá Albaníu. Í annarri athugasemd í spjalli um atvikið segir að umræddum mönnum hafi verið vísað úr landi og þeir eigi að fara úr landi í dag.
Þá segir einn Facebook notandi:
„Hef þetta staðfest eftir afar áreiðanlegum heimildum. Þessir menn sem eru ekki að áreita í fyrsta sinn eru alræmdir, frá Albaníu og sóttu hér um hæli. Það þarf ekki að tipla á tánum með það. Ég sem foreldri hringdi nokkur símtöl í kvöld og fékk þetta staðfest úr mörgum áttum – traustum heimildum. Hef einnig fengið skilaboð frá fólki sem börn þeirra hafa lent í þessum mönnum, starfsfólki t.d. úr verslun hér í bæ. Því miður þá tipla margir á tánum því þetta eru hælisleitendur! Ekki rugla saman Sýrlenskum fjölskyldum sem flýja stríð og örbirgð. Þetta eru albanskir stakir karlmenn – glæpamenn. Þetta eru staðreyndir. Það koma eflaust meiri upplýsingar á næstu dögum en eftir þau símtöl og samtöl sem ég hef átt í kvöld þá er þetta engin lygi. Þessi mál eru eldfim en það á ekki að þagga þetta. Við eigum ekki að gefa afslætti og vísa fólki burt hið snarasta sem ekkert erindi hefur hérna.“
Í dag, eftir skóla, ætla foreldrar barna í Reykjanesbæ að fjölmenna í strætisvagna til að fylgjast með og vernda börnin sem nýta sér þjónustu vagnanna.
Þegar DV leitaði eftir frekari upplýsingum um málið hjá lögreglunni á Suðurnesjum fékkst staðfest að að atvikið hafi átti sér stað. Þó nokkur símtöl hafa borist lögreglunni í gær og í morgun vegna málsins. Fréttatilkynningar er að vænta fyrir hádegi.