Gildir 15. – 21. maí
Hrútur
21. mars–19. apríl
Andaðu áður en þú æsir þig og teldu upp að 10, það borgar sig. Gefðu þér smá tíma til að kjarna þig og þá muntu ráða betur við aðstæður. Þú finnur það í vinnu og heima við að allt einhvern veginn gengur upp. Meira að segja börnin hlusta á þig, sem þér finnst örlítið grunsamlegt!
Naut
20. apríl–20. maí
Nú máttu bretta upp ermarnar því ný verkefni laðast að þér. Þú ert líka komin/n í skipulagsstuð þannig að þetta gæti verið góð vika til þess að skipuleggja ferðalagið innanlands í sumar, „glamping” gæti alveg bætt upp fyrir Tenerife-ferðina.
Tvíburar
21. maí–21. júní
Eitthvað sem þú sást fyrir þér gengur ekki alveg upp, en ekki örvænta. Nýjar dyr munu opnast. Þú sérð það ekki núna en kosmósið mun bæta þér þetta upp mjög fljótlega með jafnvel enn betri útkomu.
Krabbi
22. júní–22. júlí
Báchicka bábáw! Þú ert í sexí stuði þessa vikuna og nýtur þess að fá meiri athygli en venjulega. Nýttu orkuna til að krydda hlutina með núverandi eða fara á blinda stefnumótið sem félagi þinn var að tala um. Út fyrir þægindarammann – koma svo, haffa gaman!
Ljón
23. júlí–22. ágúst
Gefðu þér tíma til að tengjast aftur vinaböndum. Þú þarft á því að halda. Taktu upp símann, spjallaðu og planaðu vinahittinga. Ágætis tími til að sjá fyrir sér ný markmið og skrifa niður óskir og drauma. Þetta verður einstaklega skemmtilegt sumar fyrir Ljónið!
Meyja
23. ágúst–22 .sept
Elsku hógværa Meyjan okkar. Fólk á þessari plánetu les ekki hugsanir, því hvetjum við þig til að bæði hugsa upphátt og gera kröfur. Þetta litla mál í hausnum á þér hljómar miklu stærra en það er og þú munt sjá það strax á viðbrögðum annarra.
Vog
23. sept–22. okt
Það er nú ekki sjaldan sem þig dagdreymir og nú áttu næstum því erfitt með að sofna því hausinn er á flugi. Þú ert tilbúin/n fyrir þessa nýju orku sem flæðir til þín. Taktu henni opnum örmum og sjáðu öll tækifærin.
Sporðdreki
23. okt–21. nóv
Það er styrkur að sýna veikleika og það er það sem þú þarft að æfa þig í. Þú ert ekki ein/n og þetta verður allt í lagi svo lengi sem þú lofar sjálfri/um þér að dvelja í þessari tilfinningu. Sjá hana og hlusta í stað þess að bæla hana niður. Þannig kemstu á rétta braut.
Bogmaður
22. nóv–21. des
Ókei, rómansvikan búin og tími til að bretta upp ermarnar. Það er, þótt þú trúir því ekki, enn eitt verkefnið að detta til þín – nýtt atvinnutækifæri í eigin rekstri og spilin eru þér hliðholl þannig að nú er tíminn.
Steingeit
22. des–19. janúar
Það er rótgróið hjá þér að þurfa aukna athygli til að bæta upp fyrir öll þau ár sem jólin stálu athyglinni frá þeim merkisdegi þegar þú fæddist! Og það er allt í lagi. Tilvalin vika til þess að gleðja sjálfa/n þig með vinamatarboði þar sem þú syngur afmælissönginn lágt fyrir sjálfa/n þig.
Vatnsberi
20. janúar–18. febrúar
Þú ert ólm/ur í að finna þér nýtt áhugamál og ert farin/n að leita þér að kajak í Facebook-hópum og spyrja vini þína hvort enginn spili tennis lengur. En hvað sem þú ákveður þá muntu finna þig knúna/inn til þess að kaupa ALLT sem tengist nýja áhugamálinu.
Fiskar
19. febrúar–20. mars
Nú ferðu að vakna til lífsins. Hvatvísi og áhrifagirni munu einkenna þig þessa vikuna þannig að ég myndi vanda valið á þeim sem þú umgengst áður en þú klippir allt hárið eða rankar við þér í einhverri furðulegri en skemmtilegri lífsreynslu. Æ, láttu bara vaða, þetta verður góð saga eftir á!
