Ívar Guðmundsson, útvarpsmaður á Bylgjunni, hefur fylgt þjóðinni í fjölda ára í útvarpinu, en rödd hans hljómar alla virka morgna frá klukkan 10–13. Ívar er einnig eigandi Hámark, ásamt Arnari Grant, einkaþjálfari og margfaldur verðlaunahafi í fitness, auk þess að vera mikill áhugamaður um tónlist og tónleika. Ívar sýnir lesendum DV á sér hina hliðina.

Hvað halda margir um þig sem er alls ekki satt?
Að ég borði aldrei óhollt eða nammi.

Hvað finnst þér að eigi að kenna í skólum sem er ekki kennt þar núna?
Næringarfræði, svo krakkar læri strax hvað sé gott fyrir þá og hvað ekki.

Ef þú þyrftir að eyða einni milljón á klukkutíma, í hvaða verslun færirðu?
Veit ekki hvaða verslun en nýr stór flatskjár væri það fyrsta sem ég myndi kaupa og restin í hljómtæki og þar á meðal vínylplötuspilara.

Hvað viltu að standi skrifað á legsteininum þínum?
Jákvæður og hress þar til hann lést.

Sex ára barn spyr þig hvort jólasveinninn sé til. Hvernig svarar þú?
Auðvitað er hann til.

Ef þú mættir velja eitt lag sem yrði alltaf spilað um leið og þú gengir inn í herbergi allt þitt líf, hvaða lag myndirðu velja?
Ég þekki þig með Sálinni.

Hvað ætti ævisagan þín að heita?
Útvarpsmaðurinn sem gat ekki setið kyrr.

Hvaða bíómynd hefurðu séð oftast?
Með allt á hreinu og Notting Hill, get alltaf horft á þær aftur og aftur.

Hvað var í tísku þegar þú varst yngri en er það ekki lengur?
Netbolir og vera dökkbrúnn eftir ljósabekkjalegu.

Yfir hverju getur þú alltaf hlegið?
Myndböndum á netinu af óförum annarra, klassík.

Borðarðu mat sem er kominn fram yfir síðasta söludag?
Já.

Heilsarðu frægum Íslendingum úti á götu, þótt þú þekkir þá ekki persónulega?
Ég heilsa öllum.

Ef þú mættir bæta við ellefta boðorðinu, hvernig hljómaði það?
Ekki vera fáviti.

Hvaða hljóð fer mest í taugarnar á þér?
Miklar stunur í lyftingasal, en þær láta öðrum í kring líða illa.

Hvaða viðburð sérðu mest eftir að hafa misst af?
Þjóðhátíð 1986 þegar Stuðmenn trylltu alla í dalnum.

Ef þú yrðir handtekinn án skýringa, hvað myndu vinir þínir og fjölskylda halda að þú hefðir gert af þér?
Keyrt of hratt.

Hvaða teiknimyndapersónu myndirðu vilja eiga sem vin?
Batman.

Hvað myndirðu nefna landið okkar ef við þyrftum að breyta?
Regnparadís.

Hvað ættu allir að prófa að minnsta kosti einu sinni í lífinu?
Fallhlífarstökk, á það eftir.

Ef þú kæmir einn daginn heim úr vinnunni og þar væri enginn nema Geir Ólafsson í sturtu, myndirðu hringja í lögregluna?
Nei, alls ekki, myndi spyrja hann hvort sturturnar í World Class Laugum væru bilaðar.

Hver er tilgangurinn með þessu jarðlífi?
Koma næstu kynslóð upp sem góðum einstaklingum.

Hvað er framundan um helgina?
Þjóðhátíð með unnustunni, hún skipar stóran sess í okkar lífi.