Ég verð að viðurkenna að ég á fleiri varaliti en ég þarf nauðsynlega. Mér finnst varalitur yfirleitt bráðnauðsynlegur til að fullkomna útlitið – eins og skartgripur eða flúr. Líklega gæti ég séð öllum kvenkyns íbúum Skólavörðustígs (þar sem ég bý) fyrir varalit í að minnsta kosti mánuð – og ég er alltaf að finna eitthvað nýtt sem ég hreinlega verð að prófa. Það er að sjálfsögðu ekkert minna en fáránlegt að þurfa að eiga sjö mismunandi tóna af möttum rauðum lit… en ég legg í það minnsta mitt af mörkum til að láta hin kapítalísku hjól atvinnulífsins sem snúa að framleiðslu og sölu varalita snúist.

Ég ákvað að heyra í Ólöfu Eiríksdóttur, sem er sölustjóri hjá Smashbox á Íslandi, og leggja fyrir hana nokkrar spurningar um þetta áhugamál mitt – varaliti!

Hvernig lætur kona varalitinn duga sem lengst?
Þegar kemur að því að láta varalitinn endast sem lengst þarf að hafa margt í huga. Mattari formúlur eða svokallaðar „stain“ formúlur endast lengst á vörunum.  
Eins vill liturinn haldast lengur á vörunum ef þær eru grunnaðar með varalitablýanti eða jafnvel varalitaprimer.  
Klassískt ráð er einnig að móta varirnar, setja varalit. Kyssa svo tissjú. Dusta því næst örlitlu af lausu púðri á varirnar í gegnum tissjú. Það setur/festir litinn án þess að of mikið af púðri fari á varirnar og því næst er sett örlítið meira af varalit.  
Til þess að vera viss um að það verði engin breyting á sjálfum litnum er gott að nota litlausa varablýanta.
Áður en allt þetta er gert er gott að hafa varirnar sem mýkstar. Gott er að skrúbba varirnar létt á kvöldin annaðhvort með til þess gerðum varaskrúbb eða aðeins með tannburstanum og nota svo góðan varasalva yfir nóttina .

Er einhver varalitur í heiminum kelerísheldur?
Haha – tja hvernig skilgreinir maður kelerí og kelerísheldur. Nýju möttu blautu formúlurnar komast nú samt ansi nálægt því að vera kossheldar.  

Verða möttu litirnir áfram heitastir?
Möttu litirnir munu smám saman fara yfir í kremaðar og glossaðar varir. Bleikir tónar og áberandi litir koma sterkir inn og metallic áferð á vörunum gæti orðið mjög skemtilegt trend með vorinu og fram á sumar.