Ýr Þrastardóttir er konan á bak við tískumerkið Another Creation, en það er eitt þeirra merkja sem tekur þátt í Reykjavík Fashion Festival 2017 (RFF). Hátíðin er stærsti tískuviðburður ársins hérlendis og verður haldin dagana 24. og 25. mars í Hörpu. Ennþá er hægt að ná sér í miða á hátíðina á vef Hörpu.

Við ákváðum að leggja nokkrar spurningar fyrir hönnuðina sem sýna á RFF í ár, og það er Ýr Þrastardóttir, yfirhönnuður Another Creation sem er fyrst í röðinni.

Gjörið svo vel, hér kemur Ýr!

Vivienne Westwood býður þér í kvöldverð – í hverju ferðu og hvern tekur þú með þér?

Ég færi líklega í minni eigin hönnun og tæki makann með því hann er besti vinur minn og mikill sjarmur.

Hvaða stórstjörnu mundirðu vilja sjá í fötunum þínum?

Ég myndi missa mig úr gleði ef týpa á broð við Tildu Swinton myndi klæðast minni hönnun, annars er ég líka mjög hrifin af Natalie Portman, Kirsten Dunst, Cate Blanchett og Charlize Theron.

Lýstu hönnun þinni í 5 orðum

Grafísk, aðsniðin, kvenleg, nútímaleg og áberandi.

Ef þú mættir bara klæðast tveimur litum í heilt ár, hvaða litir yrðu það?

Ég get ekki ímyndað mér það þar sem ég geng mikið í litum eftir skapi, en ef ég á að velja 2 uppáhalds liti, þá eru það rauður og svartur.

Nefndu þrjár persónur eða atriði sem hafa mikil áhrif á hönnun þína

Sterkar kvenpersónur hafa mikil áhrif á hönnunina mína, einnig efnin sem ég vinn með og að lokum umhverfið.

Hvaða tónlist er í spilaranum?

Það er ný tónlist á hverjum degi, hún fer alveg eftir skapinu sem ég er í hverju sinni.

Hvar verður þú eftir fimm ár?

Vonandi ennþá starfandi fatahönnuður sem er komin lengra í faginu.

Hvað er best við RFF?

Besta er að sjá fötin lifna við á sviði þar sem ég fæ að skapa ákveðinn heim í bland við tónlist og grafík.

Hvar er hægt að fylgjast með þér?

Á Facebook Another-Creation
og Instagram @xyrx og @anothercreation1

Kynningarmyndband Another Creation fyrir RFF 2017: