Í desember bætist ein söngdívan enn í hóp þeirra sem bjóða upp á tónleikasýningar í Las Vegas. Lady Gaga byrjar sína sýningu í Park Theater þann 28. desember næstkomandi og er sýningin sú fyrsta af 27 sem búið er að tímasetja.
Og Lady Gaga gerir meira en fyrirrennarar hennar, Celine Dion, Jennifer Lopez og Britney Spears, því hún mun bjóða upp á tvenns konar sýningar.
Sýningin Lady Gaga Enigma mun leggja áherslu á vinsælustu og „hressustu“ lög hennar, á meðan Lady Gaga Jazz & Piano mun leggja áherslu á rólegri lögin. Miðasala hefst 13. ágúst.
Gaga hefur unnið til sex Grammy verðlauna og er þekkt fyrir danslög eins og Poker Face og Born This Way. Hún gaf einnig út jazzplötu með Tony Bennett.
Söngkonan leikur einnig annað aðalhlutverka myndarinnar A Star is Born á móti Bradley Cooper, sem einnig leikstýrir myndinni og er annar handritshöfunda. Myndin byrjar í sýningum í Bandaríkjunum þann 5. október.
