Foreldrar hans töldu í fyrstu að hann væri með kvefpest
Fyrir einu ári lést átta mánaða drengur í örmum móður sinnar. Sólarhring áður greindist hann með heilahimnubólgu. Foreldrar hans, Louise og John Done ákváðu að segja frá veikindum og andláti drengsins sem hét Harry í þeirri von að fólk geri sér grein fyrir alvarleika heilahimnubólgu B.
Þann 19. febrúar 2016 fengu hjónin símtal frá 19 ára dóttur John sem var heima að passa Harry. Hún sagði að þau þyrftu að koma heim strax þar sem hann væri orðinn mjög veikur.
Það sem fjölskyldan taldi vera slæmt kvef dró Harry til dauða rúmlega sólarhring síðar. „Um leið og við komum heim og sáum hann vissum við að það væri eitthvað alvarlegt að og hringdum strax á sjúkrabíl,“ segir Louise.
Um leið og Harry kom á sjúkrahúsið var hann settur á sýklalyf og fékk súrefni. Stuttu síðar byrjaði hann að fá útbrot um allan líkamann.
„Honum versnaði mikið um nóttina og þegar læknarnir sögðu mér að það ætti að svæfa hann harðneitaði ég því þar sem mig grunaði að ég myndi aldrei aftur sjá hann vakandi.“
Líkami Harry bólgnaði allur upp sökum blóðeitrunar sem var komin út um allan líkamann.
Eftir að læknarnir tjáðu foreldrum Harry að hann væri heiladauður og nýrum væru hætt að starfa ráðlögðu þeir þeim að slökkva á öndunarvélinni.
Foreldrar Harry samþykktu það og nokkrum klukkustundum síðar lést Harry í örmum móður sinnar.
Frá því að Harry lést hefur móðir hans eytt drjúgum tíma í að fræða foreldra og hvetja fólk til að bólusetja börn sín fyrir heilahimnubólgu B sem dró son hennar til dauða. Bretar byrjuðu að bólusetja fyrir sjúkdóminum í september árið 2015. Á Íslandi eru börn bólusett gegn heilahimnubólgu (meningókokkum C, ) en ekki heilahimnubólgu B (meningókokkum B.)
