Móðir í Texas hefur verið ákærð eftir að tvær barnungar dætur hennar drukknuðu í sundlaug. Dæturnar, sem voru aðeins tveggja og þriggja ára gamlar, voru með kókaín í blóðinu.

Lögreglan í Harris sýslu, nálægt borginni Houston, greindi frá því í gær, mánudaginn 11. maí, að 23 ára kona, Laura Nicholson, hefði verið handtekin og ákærð fyrir aðkomu að dauða dætra sinna tveggja, hinna tveggja ára Kelsey Kite og þriggja ára Kinsey Kite. Dæturnar drukknuðu í sundlaug í bakgarði heimilisins.

„Rannsókn okkar hefur leitt í ljós að bæði börnin voru með kókaín í blóðinu þegar þau létust,“ sagði lögreglustjórinn Ed Gonzalez í færslu á samfélagsmiðlum eins og segir í frétt People um málið. Hefur réttarmeinafræðingur úrskurðað lát þeirra sem blöndu af drukknun og kókaíneitrun. Einnig voru svokölluð bensó lyf í blóði þeirra, en algengt er að misnota slík efni sem fíkniefni.

Laura Nicholson og dætur hennar bjuggu með foreldrum hennar. Laura og faðir hennar voru sofandi í húsinu þegar slysið átti sér stað en móðirin, amma stúlknanna var að kaupa í matinn. Það var amman sem fann þær látnar í sundlauginni þegar hún kom heim úr búðinni.

Laura sagði lögreglunni að hún hefði vaknað við öskur móður sinnar úti í garði. Handfangið að bakgarðshurðinni hafði verið bilað lengi.