Katrín Ásbjörnsdóttir sérfræðingur Sýn í Bestu deild kvenna er nokkuð ósátt með ummæli sem Jón Óli Daníelsson þjálfari ÍBV lét falla eftir 2-0 sigur á Þór/KA á sunnudag.

Jón Óli var þá spurður út í meiðsli á lykilmanni liðsins, Allison Grace Lowrey. Sóknarmaðurinn knái fór af velli vegna meiðsla í leiknum á sunnudag.

Jón Óli sagði meiðsli hennar vera aftan í læri og í rassinum og talaði um að finna einhvern til að “nudda á henni blessað rassgatið.“

Katrín var spurð út í þessu ummæli í Bestu mörkunum í gær og hafði sitthvað að segja. „Þetta eru skrýtin ummæli, hann þarf að passa sig að mínu mati,“ sagði Katrín á Sýn í gær.

„Allt í lagi að tala um meiðsli, hann þarf ekki að fara alla leið með þetta. Hann þarf að gæta orða sinna.“

ÍBV eru nýliðar í Bestu deild kvenna en fara frábærlega af stað og eru með fullt hús stiga eftir fjórar umferðir.