Tara Margrét Vilhjálmsdóttir, stjórnarmeðlimur í Samtökum um líkamsvirðingu ætlar að sniðganga nýjan veitingastað Jamie Oliver á Hótel Borg en veitingastaðurinn heitir Jamie‘s Italian. Segir Tara að hún upplifi sig ekki velkomna á staðinn. Jamie Oliver hefur sagt það einstakt tækifæri að opna veitingastað á Borginni sem skipi stóran sess í menningu Reykjavíkur. Heiðurinn sé mikill.
„Þegar við opnum dyrnar, þá munum við bera fram einfalda og hagkvæman Ítalskan mat fyrir alla fjölskylduna sem er gerð úr bestu mögulegum hráefnum sem við komumst í,” sagði Jamie enn fremur.
„Ég, og aðrir feitir Íslendingar, eru greinilega ekki velkomnir þangað hvort eð er“
Tara Margrét varð þjóðþekkt eftir frægt viðtal sem Sindri Sindrason tók fyrir Stöð 2. Þar ræddi hún um fitufordóma í samfélaginu í þeirri von um að kveða þá niður. Henni varð þó ekki að ósk sinni því eftir það viðtal segir Tara að flóðgáttir fitufordóma hafi opnast og varð hún fyrir svæsnum árásum á samfélagsmiðlum og kommentakerfum fjölmiðla. Í stað þess að fara í felur hélt Tara ótrauð áfram að vekja athygli á fitufordómum í íslensku samfélagi. Tara hefur nú stofnað glæsilega like síðu í eigin nafni þar sem hún heldur áfram að vekja athygli á málstaðnum en síðuna má finna hér. Í dag fjallar hún síðan um af hverju hún upplifir sig óvelkomna á veitingastað hins heimsfræga kokks. Þar deilir Tara gömlu myndskeiði sem hefur farið aftur á flakk eftir að Jamie Oliver tjáði sig um feit börn á Nýja-Sjálandi. Í viðtalinu sagði Jamie meðal annars:
„Á Nýja Sjálandi, rétt eins og í Bretlandi er að finna mörg af feitustu börnum á jörðinni. Það er ógeðslegt, út í hött.“ Bætti kokkurinn við eftir þessi umdeildu ummæli að það þyrfti að setja á sykurskatt í landinu undir eins.
Tara birtir auglýsinguna á Facebook-síðu sinni en á þeim tíma sem auglýsingin var tekin var verið að auglýsa nýja þáttaröð Jamie Oliver sem fjallaði um skólamáltíðir barna. Tara segir:
„Jamie hefur lengi verið talsmaður heilbrigðari fæðu fyrir skólabörn og það er verðugt málsefni. En þegar hann talar niður til og smánar feit börn í leiðinni er hann að valda meiri skaða en gagni. Hann hefur m.a. haft uppi stórar yfirlýsingar um „offitufaraldurinn“ og kallað feit börn ógeðsleg.“
Segir Tara að í myndskeiðinu taki Jamie fituhatur sitt skrefi lengra með því að afmynda sjálfan sig og klæða sig í fitugalla til að gera grín að feitu fólki í auglýsingaskini. Með þessu fari hann gegn öllum ráðleggingum hvernig eigi að efla lýðheilsu barna og minnir Tara á að feit börn séu í meiri hættu en önnur að verða fyrir einelti.
Þetta myndband og orðræða Jamies er svo sannarlega olía á eld þess fituhaturs sem börnin okkar alast upp við.
„Þetta myndband og orðræða Jamies er svo sannarlega olía á eld þess fituhaturs sem börnin okkar alast upp við. Og allt er þetta að sjálfsögðu gert í nafni „heilsu“ en ekki gróðasjónarmiða(!) Hann hefði svo auðveldlega getað farið þá leið að skoða skólamáltíðir og gera þær heilsusamlegri án þess að sigta út feit börn. Öll börn þurfa heilbrigða fæðu óháð holdafari þeirra. Þetta er meðvituð ákvörðun að fara þessa leið vegna að þess að fituhatur selur,“ segir Tara og bætir við:
„Ég veit ekki með ykkur en ég mun ekki stíga fæti inn fyrir dyr nýs veitingastaðar þessa manns hér á landi. Ég, og aðrir feitir Íslendingar, eru greinilega ekki velkomnir þangað hvort eð er.“
Hér má finna nýja Facebook-síðu Töru og hér fyrir neðan hið umdeilda myndband:
[youtube https://www.youtube.com/watch?v=Z_6d3DmYyC0&w=640&h=360]
