José Mourinho gæti verið á leið aftur til Real Madrid samkvæmt nýjustu fréttum frá Spáni. Þrátt fyrir opinberar yfirlýsingar um annað eru sagðar hafa átt sér stað viðræður á milli Mourinho, umboðsmanna hans og forráðamanna Real Madrid undanfarna daga og vikur.
Fabrizio Romano segir frá þessu.
Samkvæmt heimildum eru viðræðurnar enn í gangi og talið er að möguleg endurkoma Portúgalans sé raunhæfur kostur fyrir spænska stórveldið. Mourinho stýrði Real Madrid á árunum 2010 til 2013 og vann meðal annars spænska meistaratitilinn með liðinu.
Mourinho er nú knattspyrnustjóri Benfica í Portúgal en hefur lengi verið orðaður við stór lið víðs vegar um Evrópu. Hann hefur áður lýst því yfir að hann eigi enn sterkar tilfinningar til Real Madrid og stuðningsmanna félagsins.
Framtíð málsins virðist nú vera í höndum Florentino Pérez, forseta Real Madrid, sem þarf að taka endanlega ákvörðun um hvort félagið ætli að sækja Mourinho á nýjan leik.
