Manchester United hefur samkvæmt enskum miðlum áhuga á að reyna að fá franska miðjumanninn Aurélien Tchouaméni til félagsins í sumar ef Real Madrid ákveður að selja hann.
Tchouaméni, sem er 26 ára gamall, hefur verið mikilvægur leikmaður hjá spænska stórveldinu síðan hann kom frá Mónakó árið 2022. Þrátt fyrir það hafa verið uppi vangaveltur um framtíð hans hjá félaginu vegna harðrar samkeppni á miðsvæðinu.
Samkvæmt Manchester Evening News fylgist Manchester United grannt með stöðu mála og er tilbúið að gera tilraun til að lokka franska landsliðsmanninn á Old Trafford ef Real Madrid opnar á sölu.
United vill styrkja miðjuna fyrir næsta tímabil og er talið að félagið ætli að fjárfesta verulega í nýjum leikmönnum í sumar. Tchouaméni hefur lengi verið talinn einn besti varnarsinnaði miðjumaður Evrópu og gæti orðið lykilmaður í enduruppbyggingu liðsins.
Ekki er þó talið líklegt að Real Madrid samþykki sölu nema mjög hátt tilboð berist.
