„Þetta er ákveðin áskorun að takast á við enda var fyrri myndin mjög vel gerð, skemmtileg og gekk alveg glimrandi vel. Þannig að er það er búið að setja markið ansi hátt. En það gerir þetta líka spennandi. Ég hlakka mjög mikið til,“ segir Elísabet Ronaldsdóttir klippari en hún kemur til með að klippa framhald hinnar geysivinsælu Hollywood-kvikmyndar Deadpool. Tökur á myndinni hefjast í Vancouver í Kanada í júní næstkomandi og þá mun myndin rata í kvikmyndahús á næsta ári.

Deadpool segir frá samnefndri andhetju úr Marvel-teiknimyndasöguheiminum og fer stórstjarnan Ryan Reynolds með aðalhlutverkið. Fyrri Deadpool-myndin varð einn óvæntasti bíósmellur seinasta árs og er nú orðin ein tekjuhæsta bannaða mynd allra tíma. Það er því ljóst að ófáir bíða spenntir eftir því að sjá hina kaldhæðnu og orðljótu andhetju birtast á tjaldinu á ný.

Ryan Reynolds fer með hlutverk andhetjunnar Deadpool í samnefndri kvikmynd.

Óhætt er að setja Elísabetu í hóp með þeim færustu í bransanum en hún hefur klippt margar af stærstu íslensku kvikmyndunum. Deadpool 2 er þriðja samstarfsverkefni Elísabetar og leikstjórans David Leitch en áður hefur hún klippt Hollywood-hasarsmellinn John Wick, auk kvikmyndarinnar Atomic Blonde með þeim Charlize Theron og James McAvoy í aðalhlutverkum, sem verður frumsýnd í sumar.

„Hann er einstaklega skemmtilegur í samstarfi og opinn fyrir því að prófa nýja hluti,“ segir Elísabet um Leitch þegar blaðamaður slær á þráðinn til hennar. Hún bætir því við að stór hluti þeirra sem komu að framleiðslu John Wick og Atomic Blonde muni nú einnig koma að gerð Deadpool 2.

„Þannig að þetta er virkilega „solid“ og þéttur hópur og við kunnum vel inn á hvert annað. Við erum mjög bjartsýn og jákvæð gagnvart þessu öllu saman.“

Elísabet dvaldi í Los Angeles fyrr á árinu og vann að gerð gerð kitlu eða „teaser“ fyrir myndina sem frumsýnd var á dögunum. Ekki er þó um hefðbundna kitlu að ræða, heldur nokkurs konar stuttmynd. „Það sem gerir hana öðruvísi er að hún er sjálfstætt verk, og þetta er ekki sena sem verður í myndinni.“

[youtube https://www.youtube.com/watch?v=Z5ezsReZcxU&w=600&h=480]

Deadpool er að margra mati ein áhugaverðasta myndasögupersóna sem fram hefur komið undanfarin ár en sérstaða sagnanna felst meðal annars í því að persónan brýtur reglulega fjórða vegginn og talar beint til áhorfenda. Elísabet segir að þannig skapist frelsi sem ekki finnist annars staðar. „Mér finnst mjög gaman að þenja formið og skoða það – þetta afþreyingarform. Það er svo spennandi að sjá hvað maður kemst upp með, þá sérstaklega þegar maður vinnur í þessum „blockbuster“-heimi.“