Óhætt er að segja að gleðin hafi verið við völd á Hótel Hilton Reykjavík Nordica á sunnudagskvöld þegar Edduverðlaunin 2017 voru afhent. Um er að ræða stærstu verðlaunahátíð sem haldin er hér á landi á sviði kvikmynda- og sjónvarps.
Kvikmyndin Hjartasteinn var ótvíræður sigurvegari kvöldsins en myndin hlaut alls tíu verðlaun, meðal annars sem kvikmynd ársins, fyrir leikstjórn, handrit, kvikmyndatöku og klippingu. Blær Hinriksson var valinn besti leikarinn fyrir Hjartastein en Hera Hilmarsdóttir besta leikkonan fyrir Eiðinn. Helgi Seljan var valinn sjónvarpsmaður ársins og Ligeglad var valið besta leikna sjónvarpsefni ársins.
Ljósmyndari DV var á svæðinu og náði þessum myndum.
Öflugt teymi Aðstandendur þáttarins Með okkar augum voru kátir þegar verðlaunin voru afhent. Þátturinn var valinn Menningarþáttur ársins og er vel að þeim verðlaunum kominn.
Sigurvegarar Hjartasteinn sópaði að sér verðlaunum á hátíðinni og hlaut alls tíu verðlaun. Aðalhlutverkin voru í höndum ungra og efnilegra leikara sem svo sannarlega eiga framtíðina fyrir sér.
Frábærar Tvær af ástsælustu leikkonum þjóðarinnar, Edda Björgvinsdóttir og Helga Braga Jónsdóttir, voru brosmildar að vanda á hátíðinni.
Ráðherra og fréttakonur Bjarni Benediktsson forsætisráðherra stillir sér hér upp við hlið Fanneyjar Birnu Jónsdóttur, fyrrverandi aðstoðarritstjóra Fréttablaðsins, og Viktoríu Hermannsdóttur, fréttakonu hjá RÚV. Kærasti Viktoríu, grínistinn og þúsundþjalasmiðurinn Sólmundur Hólm, var kynnir hátíðarinnar.
Tilnefnd Nanna Kristín Magnúsdóttir er hér við hlið kærasta síns, Gauts Sturlusonar lögfræðings. Nanna Kristín hlaut tilnefningu sem besta leikkona í aukahlutverki í myndinni Hjartasteinn. Verðlaunin komu hins vegar í hlut Nínu Daggar Filippusdóttur einnig fyrir Hjartastein.
Töff mæðgur Svala Björgvinsdóttir og Ragnheiður Björk Reynisdóttir voru glæsilegar á hátíðinni á sunnudagskvöld. Svala undirbýr sig nú af kappi fyrir forkeppni Eurovision um næstu helgi.
Hjónin Vilborg Halldórsdóttir og Helgi Björnsson voru í sínu fínasta pússi á hátíðinni.
