Rithöfundurinn Hallgrímur Helgason segir farir sínar ekki sléttar, en eftir að hafa fengið gesti í mat til sín á mánudaginn er hann einn fjölmargra einstaklinga í hópsmiti tengdu Hamborgarafabrikkunni í Kringlunni, þrátt fyrir að hafa ekki borðað á staðnum sjálfur.

„Fengum unga gesti á mánudag sem höfðu setið á Hamborgarafabrikkunni á laugardag og snætt barnaborgara. Gestirnir ældu aðfararnótt þriðjudags og nú sit ég í súpunni,“ segir Hallgrímur í færslu á Facebook. Kann hann veitingastaðnum litlar þakkir fyrir og segir: „nóttin lét mig sjá lífið í nýju ljósi! Í alvöru, þessi ferðaþjónusta á eftir að drepa okkur.“ 

Hvetur hann fólk til að þvo sér um hendur, ekki spritta og fara varlega.

Húmórinn hefur þó ekki yfirgefið Hallgrím í veikindunum og smellti hann í ljóð:

Á Fabrikkuna fór ég ekki
en fékk þó þaðan gesti.
Nú norpa ég í norðantrekki
Með Nóró þarmabresti.

Yfir 100 tilkynningar um smit

Eins og DV fjallaði um fyrr í vikunni greindu fjölmargir einstaklingar frá því í Facebook-hópnum Matartips að hafa veikst eftir að borða á veitingastaðnum. Fyrirtækið lokaði staðnum og fór í að sótthreinsa staðinn hátt og lágt og henda matvöru. Fyrst var grunur á að um matareitrun væri að ræða, en eftir vettvangsskoðun Heilbrigðiseftirlits Reykjavíkur er vinnutilgáta eftirlitsins að nóróveirusýkingu sé að ræða og því tilfellið flokkað sem hópsýking. Rannsókn er enn í gangi, og hefur ekki verið staðfest að um nóróveirusýkingu sé að ræða, en eftirlitið hefur fengið yfir 100 ábendingar um smit.

Sjá einnig: Loka Fabrikkunni í Kringlunni í dag til að ganga úr skugga um hvort að gestir hafi orðið fyrir matareitrun

Sjá einnig: Grunur um að nóróveira hafi valdið matareitrun á Fabrikkunni – Eigendur lokuðu eftir ábendingar

Í til­kynn­ingu frá Maríu Rún Hafliðadótt­ur, fram­kvæmda­stjóra Ham­borg­arafa­brikk­unn­ar í dag kom fram að Hamborgarafabrikkunni á Höfðatorgi var lokað í dag svo hægt væri að sótthreinsa þar líka. Var ákvörðunin tekið í samráði við Heilbrigðiseftirlit Reykjavíkur. Þar segir að at­b­urðir liðinna daga séu stjórn­end­um mikið áfall og er viðskipta­vin­um og starfs­mönn­um þakkað fyr­ir skiln­ing og þol­inmæði. 

Til­kynn­ing Ham­borg­arafa­brikk­unn­ar

„Eins og komið hef­ur fram í frétt­um var Ham­borg­ar­afa­brikk­unni í Kringl­unni lokað tíma­bundið í sam­starfi við heil­brigðis­eft­ir­litið. Var það gert til að gæta fyllsta ör­ygg­is í kjöl­far ábend­inga frá viðskipta­vin­um okk­ar. Í sam­starfi við heilbrigðiseftirlitið var staður­inn skoðaður  og sótt­hreinsaður með ör­yggi viðskipta­vina og starfsmanna í huga.  Fabrikk­an í Kringl­unni hef­ur verið opnuð á ný.  Eig­end­ur Fabrikk­un­ar hafa ákveðið að loka staðnum á Höfðatorgi í dag og ráðast í sömu aðgerðir og var farið í í Kringl­unni með ör­yggi viðskipta­vina og starfs­manna í huga.  

Ham­borg­arafa­brikk­an hef­ur starfað í rúm 13 ár og ávallt lagt áherslu á vönduð vinnu­brögð og gæði mat­ar og þjón­ustu. Það er okk­ur því mikið áfall að upp­lifa at­b­urði af þess­um toga. Við þökk­um viðskipta­vin­um okk­ar og starfs­mönn­um fyr­ir skiln­ing­inn og þol­in­mæðina.“