Sigurbjörn Daði Dagbjartsson, gítarleikari og Grindvíkingur með meiru hefur stigið á svið í Húsi Máls og menningar í sumar við mikinn fögnuð gesta. Sibbi eins og hann er jafnan kallaður kemur fram undir nafninu Sibbi & og með honum á sviði hefur komið fram rjómi íslenskra tónlistarmanna.

Á borðum liggja frammi söngbækur sem Sibbi hefur tekið saman, Söngbók Sibba, og geta allir valið óskalög sem hljómsveitin spilar síðan og syngur, jafnan við mikinn fögnuð.
Eins og sjá má á meðfylgjandi myndbandi vakti ferðamaður frá Frakklandi mikla athygli, en hann dansaði af miklum móð og naut sín vel sitt síðasta kvöld á Íslandi.

Sibbi og félagar stíga á svið í kvöld og hefst fjörið á slaginu 19.30. Með Sibba á sviðinu verða Hálfdán Árnason bassaleikari, Kjartan Baldursson gítarleikari og Sigfús Örn Árnason (Fúsi Óttars) trommuleikari sem trommaði meðal annars með Rikshaw á níunda áratugnum. „Fyndið að í kvöld kemur ítalskur túristi og vill syngja Rio með Duran Duran en þegar ég sá myndband við Into the burning moon með Rikshaw, þá hélt ég að það væri með Duran Duran,“ segir Sibbi spenntur að stíga á svið.