Það er hátt til lofts í eign sem nýlega hefur verið skráð á sölu í Reykjanesbæ. Um er að ræða svokallaða „penthouse“ íbúð á efstu hæð þar sem hægt er að njóta útsýnis frá þrennum svölum.
Í lýsingu fasteignasala segir: „Virkilega glæsileg penthouse íbúð á efstu hæð með frábæru útsýni frá þrennum svölum“
Mikil lofthæð er í íbúðinni en eldhús, borðstofa og stofa eru allt í einu björtu rými. Þaðan er hægt að ganga út á svalir með útsýni yfir bæinn og svo á aðrar með hafútsýni og heitum potti. Eins er hægt að ganga út á svalirnar með heita pottinum beint frá baðherbergi.
Hjónaherbergið er svokölluð „svíta“ með sérsmíðuðum skápum og litlu svölum. Á efri hæð er svo að finna rúmgott aukaherbergi og eins er hægt að breyta sjónvarpsrými í þriðja herbergið.
Með eigninni fylgir stæði í bílastæðahúsi og hefur gönguleið frá bílastæðahúsi að eigninni verið yfirbyggð.
Ekki þarf að örvænta þó eignin sé á efstu hæð þar sem lyfta er í húsinu. Íbúðin er 104 fermetrar að stærð og ásett verð er 94 milljónir.
Frekari upplýsingar má finna á fasteignavef DV en þar má til dæmis finna upplýsingar um ástand eignar, verðsögu og fleira.
