Ferðaþjónusta á Kýpur hefur orðið fyrir verulegum skakkaföllum vegna spennunnar í Miðausturlöndum, þrátt fyrir að eyjan sjálf hafi að mestu sloppið við bein áhrif átakanna.

Samkvæmt erlendum miðlum hefur ferðamönnum fækkað um allt að 30 prósent og hótelbókanir dregist saman um 40 prósent á síðustu mánuðum.

Kýpur hefur lengi verið meðal vinsælustu sumarleyfisáfangastaða Breta og heimsækja um 1,3 milljónir Breta eyjuna árlega. Nú virðist hins vegar ótti ferðamanna við óstöðugleika á svæðinu hafa haft mikil áhrif á greinina, að því er fram kemur í umfjöllun breskra fjölmiðla.

Árásin hafði veruleg áhrif

Áhyggjur jukust verulega í mars síðastliðnum þegar íranskur dróni hæfði bresku herstöðina RAF Akrotiri á eyjunni. Þótt yfirvöld hafi sagt skemmdirnar hafa verið óverulegar virðist árásin hafa haft töluverð áhrif á ímynd landsins sem öruggs ferðamannastaðar.

Kýpur er staðsett austast í Miðjarðarhafi, skammt frá ströndum Líbanons og Sýrlands, og hefur nálægðin við átakasvæðin orðið til þess að margir ferðamenn forðast að bóka ferðir þangað.

Samkvæmt Tom Antoniou, sem selur skemmtisiglingar í borginni Paphos, hafa bókanir í siglingar dregist saman um helming frá því átökin hófust. Þá hafa áður fjölmennir ferðamannastaðir á borð við Larnaca, Limassol og Protaras verið óvenju tómlegir síðustu vikur.

Ferðir seldar með miklum afslætti

Í frétt Telegraph kemur fram að á sumum vinsælum hótelum séu svo fáir gestir að sundlaugar og sameiginleg svæði séu nánast mannlaus. Veitingastaðir, barir og verslanir sem áður byggðu afkomu sína á ferðamönnum glíma nú við mikinn samdrátt.

Angelides Christos, framkvæmdastjóri Samtaka hótela á Kýpur, segir að staðan hafi aðeins batnað síðustu vikur en tekjutapið sé enn mikið.

„Flæðið hefur aukist á ný, en það dugar ekki til að bæta upp það tap sem varð vegna afbókana og þeirra vikna sem glötuðust,“ sagði hann í samtali við Cyprus Mail.

Ferðaþjónustan varð sérstaklega fyrir áfalli eftir að Bandaríkin og Ísrael hófu árásir á Íran í lok febrúar. Þegar Íran svaraði með gagnárásum nokkrum dögum síðar jókst ótti ferðamanna enn frekar og fjöldi afbókana rauk upp.

Ferðaskrifstofur bjóða nú vikudvöl á eyjunni á mun lægra verði en áður, meðal annars til staða á borð við Paphos, Protaras og Ayia Napa. Þrátt fyrir lægra verð virðist þó áhugi ferðamanna enn takmarkaður á meðan óvissa ríkir um þróun mála í Miðausturlöndum.