Það lítur út fyrir að Díana Spencer Bretaprinsessa muni sigra heiminn á ný í gegnum áströlsku leikkonuna Emmu-Louise Corrin í nýjustu seríu The Crown á Netflix. 23 ár eru frá því að prinsessan lést skyndilega í bílslysi aðeins 36 ára gömul. Leikkonan unga þykir sláandi lík Díönu prinsessu en þær eru einnig báðar hávaxnar. Díana var 178 cm en Corrin er 174 cm. Corrin er fædd 1995 og hafði ekki mikið leikið þar til hún hreppti hlutverk í þáttaröðinni un bresku konungsfjölskylduna og þar með varð hún ein umtalaðasta leikkona heims.
Þykir búningahönnuðurinn Amy Roberts hafa unnið þrekvirki í þáttunum og lífgað við einstakan og eftirminnilegan klæðnað prinsessunar. Allt frá kindapeysum upp í stórkostlegan gala-klæðnað.
Mikið hefur verið lagt í alla umgjörð þáttanna en beðið var með mikilli eftirvæntingu eftir að Díana yrði kynnt til leiks. Klæðnaður prinsessunnar dáðu var saumaður eftir myndum og er oft um mjög nákvæma eftirlíkingu að ræða í þáttunum. Jafnvel minnstu smáatriði skína í gegn og má ætla að geysimiklar vinsældir þáttanna séu ekki síst raunveruleikablænum að þakka sem fæst með svo nákvæmum eftirmyndum. Díana prinsessa var mjög vinsæl og þótti hún ákaflega glæsileg en um leið alþýðleg eins og sést oft á klæðnaði hennar.