Enginn bilbugur er á Jóni Gunnarssyni, þingmanni Sjálfstæðisflokksins í Kraganum, þegar kemur að framboði í næstu þingkosningum. Hann brennur enn fyrir verkefninu og aftekur með öllu að til greina komi hjá honum að bjóða sig fram fyrir Miðflokkinn eða nýjan flokk Arnars Þórs Jónssonar. Ekki hefur verið ákveðið að hafa prófkjör, sem samkvæmt reglum Sjálfstæðisflokksins er meginleiðin til að velja á lista. Jón segir að það verði fólksins í flokknum að velja þá sem verði á framboðslistanum. Jón er gestur Ólafs Arnarsonar í hlaðvarpi Eyjunnar.

Hlýða má á brot úr þættinum hér:

Eyjan - Jon Gunnarsson - 7

Ég verð að spyrja þig svona í lokin, einnar spurningar. Það verður kosið á næsta ári – ekki seinna en á næsta ári.

„Ekki seinna en á næsta ári, þar skulum við vera sammála.“

Ferð þú fram?

„Já, ég svo sem hef engar aðrar hugmyndir í dag en að gera það.“

Og þú ætlar fram fyrir Sjálfstæðisflokkinn? Þitt nafn hefur heyrst nefnt í tengslum við annan flokk.

„Já, ég tel það mér ekki til tekna að ég skuli vera spyrtur við Miðflokkinn. Það nýjasta sem var hringt í mig út af var út af þessu framboði hjá Arnari Þór, vini mínum, en mér finnst nú mjög miður að hann skuli hafa farið í þann farveg vegna þess að auðvitað þurfa hægri menn í pólitík að sameinast og þeir þurfa að sameinast undir þessum formerkjum sem við höfum verið að fara yfir í þessu samtali okkar,“ segir Jón.

Hann segist vera tilbúinn til að axla ábyrgð áfram. Aðspurður um það hvort hann ætli í prófkjör segir hann: „Ég er í fullu fjöri. Það kemur bara í ljós hvaða leið verður valin hjá flokknum. Það er ekki búið að ákveða prófkjör hjá flokknum. Það er meginleiðin samkvæmt okkar reglum en kjördæmisráðin hafa heilmikið svigrúm til þess að velja öðruvísi leiðir. Sumir hafa haldið t.d. tvöfalt kjördæmisþing og í okkar kjördæmi væri slík samkoma 1200 manns.“

Jón segir val á lista verða með lýðræðislegum hætti. „Ég man ekki á mínum ferli, hvort við erum einu sinni búnir að stilla upp vegna þess að kveikurinn brann upp á svo skömmum tíma að það var ekki tími til að fara í einhverjar aðrar valleiðir. En, já, ég brenn fyrir þetta enn þá og hef þess vegna alveg áhuga á að taka þátt í þessu en svo er það bara fólkið í flokknum sem ræður því hverjir verða á listanum.“

Hægt er að hlusta á hlaðvarpið í heild sinni hér: