Fjórir flokkar stjórnarandstöðunnar á Alþingi eru að leggja fram vantrauststillögu á Jón Gunnarsson dómsmálaráðherra. Frá þessu greinir Fréttablaðið.

Flokkarnir sem standa að tillögunni eru Samfylkingin, Píratar, Viðreisn og Flokkur fólksins.

Samkvæmt heimildum Fréttablaðsins er vantraustið lagt fram á grundvelli þess að Jón Gunnarsson hafi brotið lög þegar hann bannaði Útlendingastofnun að senda upplýsingar sem þingið hafði kallað eftir um veitingu ríkisborgararéttar.

Þingmenn flokkanna fjögurra telja að Jón hafi brotið lög þegar hann kom í veg fyrir að Alþingi fengi þessar upplýsingar, en eftir þeim hafi ítrekað verið óskað. Jón sem æðsti handhafi framkvæmdavalds hafi brotið grunnreglu. Talið er líklegt að tillagan verði tekin fyrir á Alþing á morgun, fimmtudag.

„Við skiljum ekki hvernig ráðherra hefur hagað sér. Lögbrot Jóns eru grafalvarlegt máls,“ hefur Fréttablaðið eftir þingmanni í stjórnarandstöðunni.

Mbl.is hefur eftir Sigmari Guðmundssyni, þingmanni Viðreisnar, að það sé skýrt að Jón hafi brotið lög.

„Hann fyrirskipar það að það eigi ekki að afhenda þinginu þessi gögn nema í þessari réttu tímaröð og þá fær þingið ekki gögnin samkvæmt þeim tímaramma sem kveðið er á um í þingskapalögum. Þingið vildi fá þessi gögn innan þessa frests, hann sagði nei og þar er hann brotlegur.“