„Myndi stjórnandi fótboltaliðs snúa sér að leikmönnum og óska eftir tillögum þeirra eða óskum um það, hver stefna og leikaðferðir liðsins ættu að vera? Myndi skipstjóri haga sinni skipstjórn í samræmi við óskir og vilja áhafnar? Myndi stjórnandi sinfóníuhljómsveitar leita ráða og leiðsagnar um stjórn tónverks hjá liðsmönnum sveitarinnar?“ skrifar Ole Anton Bieltvedt í aðsendri grein á Eyjunni.

Ole Anton segir að leiðtogi verði auðvitað að hlusta á hópinn, vera opinn fyrir gagnrýni og ráðgjöf, skilja sameiginlegan vilja, en, umfram allt, verði hann að vera leiðtogi, sem hefur þekkingu, reynslu og burði til að móta heildstæða eigin stefnu, taka af skarið, gefa tóninn og leiða, og, ef í harðbakkann slær, leiða hópinn eins og forustusauður leiðir fjárhópinn yfir straumharða á eða erfiðan fjallveg.

Hann segir að þótt flokksmenn Kristrúnar, sem fjölmenntu á 40 opna fundi sem hún hélt um allt land, hafi lýst miklum áhuga á bættum heilbrigðismálum, samgöngum og húsnæðismálum þá vanti hjá henni hvernig eigi að fjármagna tillögurnar sem hún setti fram fyrir skemmstu.

Ole Anton segir enga sérstaka pólitíska stefnu felast í því að vilja betra heilbrigðiskerfi, bættar samgöngur og úrbætur í húsnæðismálum. Allir flokkar landsins styðji þessi markmið. Þetta sé spurning um almenna aukna velferð landsmanna, sem allir flokkar vilji vinna að, þó að með nokkuð ólíkum hætti sé.

Ekkert nýtt felist því í þessum ófjármögnuðu tillögum Kristrúnar Frostadóttur.

Ole Anton gefur lítið fyrir þau orð Kristrúnar í hlaðvarpi Markaðarins á dögunum að stærð kökunnar skipti ekki máli. Fyrst þurfi að skilgreina þörf og svo aðlaga stærð kökunnar að henni

„Til að skapa velferð, þarf fyrst að skapa þannig ramma um efnahagsmálin, að atvinnulífið megi vaxa og dafna. Aukin verðmætasköpun, eða útgjaldalækkun, sem ekki bitnar á velferð, er forsenda aukinnar velsældar,“ skrifar Ole Anton.

Stærð kökunnar skiptir öllu máli

Hann segir stærð kökunnar skipta öllu máli og eftir því sem betur takist til við að stækka hana sé betur hægt að styðja við útgjaldaverkefnin. Stóru málin séu Evrópumálin og þar hafi Kristrún fallið á prófinu vegna þess að hún treysti sér ekki til að setja Evrópumálin í forgang vegna þess að margir séu á móti því

„Auðvitað stenzt þetta ekki. Á þessu stigi erum við bara að tala um það eitt, að ljúka samningaviðræðum við ESB og sjá, hvað út úr þeim kemur. Auðvitað án fyrirfram skuldbindinga. Hvernig gætu slíkar þreifingar og samningaumleitanir klofið þjóðina?“ skrifar Ole Anton.

Hann bendir á að upptaka evru sé eitt stærsta hagsmunamál Íslendinga og að við ættum að horfa til Norðmanna þegar kemur að gjaldtöku fyrir aðgang að sameiginlegum auðlindum. Þá sé ný stjórnarskrá mál sem brenni á stórum hluta þjóðarinnar.

Kristrún geri hins vegar lítið eða ekkert með þessi stóru mál

„Það er synd, að vel menntaður hagfræðingur og banka- og efnahagssérfræðingur, sem vill verða leiðandi stjórnmálamaður hér, skuli ekki sjá eða skilja, að ESB og Evran gætu tryggt okkur meiri aukningu velferðar, þó að það muni taka nokkurn tíma, en aðrar leiðir eða skref.“

Þrátt fyrir vonbrigði Ole Antons með þá stefnu sem Kristrún hefur sett fram segist hann vona að næsta ríkisstjórn samanstandi af Samfylkingunni, Viðreisn, Pírötum og mögulega Flokki fólksins eða Sósíalistaflokknum sem taki við völdum í síðasta lagi árið 2025.

Grein Ole Antons Bieltvedt í heild má lesa hér.