Brim hf. hefur gert hluthöfum í fyrirtækinu tilboð um að kaupa ákveðið hlutfall af af hlutafé í félaginu. Kemur tilboðið strax í kjölfar samþykktar stjórnar fyrirtækisins á tilboði um kaup á öllu hlutafé í Lýsi hf. sem fjármagna á til helminga með hlutafé í Brim. Virðist því ekki annað en að tilboðið til hluthafanna sé tilkomið vegna kaupanna á Lýsi. Hafa hluthafar lítinn tíma til að svara tilboði fyrirtækisins.
Rétt eftir miðnætti í nótt var birt tilkynning á vef Kauphallarinnar um að stjórn Brims hefði samþykkt samþykkt kaup á öllum hlutabréfum í Lýsi hf. fyrir 20 milljarða króna. Tilkynnt hafi verið um samþykki eigenda Lýsis við kauptilboði Brims þann 23. september 2025 með fyrirvara um samþykki stjórna félaganna, hluthafafundar kaupanda og samþykki Samkeppniseftirlitsins. Endursamið hafi verið um verð og greiðslukjör í viðskiptunum sem taki m.a. tillit til vaxtaberandi skulda. Heildarkaupverð greiðist til helminga með reiðufé og til helminga með hlutabréfum í Brim og sé miðað við gengið 85 krónur á hvern hlut í félaginu þannig að seljendur Lýsis eignist í kjölfar viðskiptanna 117.647.058 hluti sem samsvari um 6 prósent af heildarhlutafé Brims, nái félagið (Brim, innsk. DV) að nýta eigin bréf í þágu viðskiptanna. Kaupverðið verði allt greitt að fullu þegar viðskiptin verði frágengin að fengnu samþykki opinberra aðila.
Um 10 mínútum eftir að tilkynning um samþykkt stjórnar Brims á kaupunum á Lýsi var birt birtist tilkynning um tilboð Brims til hluthafa í fyrirtækinu.
Þar segir að Brim bjóði hluthöfum kaup á hlutabréfum að nafnvirði 70 milljónir króna að nafnverði á genginu 88 krónur fyrir hvern hlut. Arctica Finance hf. hafi umsjón með viðskiptum. Vísað er til þess að á aðalfundi félagsins fyrr á þessu ári hafi stjórn veitt heimild til þess að Brim kaupi eigin hluti í félaginu. Heimildin takmarkist við að samanlögð kaup fari ekki yfir 10 prósent af heildarhlutafé félagsins á hverjum tíma. Kaupgengi eigi að vera hærra en í síðustu óháðu viðskiptum eða hæsta fyrirliggjandi óháða kauptilboð í þeim viðskiptakerfum þar sem viðskipti með hlutina fari fram, hvort sem hærra sé. Tilgangur viðskiptanna sé að tryggja félaginu eigin hluti til frekari vaxtar og fjárfestinga.
Því virðist ekki annað en helsti tilgangurinn með tilboðinu sé að kaupa hlutabréf í fyrirtækinu vegna kaupanna á Lýsi. Þannig að fyrirtækið sjálft hafi yfir nógu miklu af hlutafé að ráða til þess að geta staðið við tilboðið til seljenda Lýsis.
Um hádegisbilið var síðan birt enn önnur tilkynning á vef Kauphallarinnar og í þetta sinn um fyrirkomulag kaupanna.
Þar er áréttað að þar sem tilboðið hljóði upp á kaup á hlutabréfum að nafnvirði 70 milljónir króna að nafnverði á genginu 88 krónur fyrir hvern hlut geti samanlagt kaupverð hluta af hálfu Brims því að hámarki numið 6.160.000.000 krónum.
Allir hluthafar Brims, sem skráðir séu í hlutaskrá eftir lok viðskipta föstudaginn 29. maí 2026, geti samþykkt tilboð Brims. Komi til þess að eftirspurn vegna tilboðs verði umfram áðurnefnda hámarksfjárhæð tilboðsins muni Brim kaupa í hlutfalli við eignarhlutfall þeirra hluthafa sem taki þátt.
Ljóst er að fyrirvarinn til hluthafa er ekki mikill en þeir sem vilja taka tilboðinu verða að senda samþykki sitt fyrir klukkan 18:00 í kvöld.
Samkvæmt heimildum Eyjunnar fengu hluthafar senda tilkynningu um tilboðið fyrst í dag og hafa því ekki mikinn tíma til að hugsa sig um.
Stærstu hluthafar Brims eru Útgerðarfélag Reykjavíkur sem á um 44 prósent hlut en eigandi meirihluta hlutafjár í því félagi er Guðmundur Kristjánsson forstjóri Brims. Þar á eftir koma tveir lífeyrissjóðir með samtals um 24 prósent hlut. Brim sjálft átti í lok apríl 1,56 prósent hlutafjár. Þar sem félagið er skráð í Kauphöllina er heildarfjöldi hluthafa þó nokkur.
