Helgi Áss Grétarsson, varaborgarfulltrúi Sjálfstæðisflokksins, sakar Dag B. Eggertsson um að hafa sett upp leiksýningu varðandi hugmyndir um skógarhögg í Öskjuhlíð í tengslum við Reykjavíkurflugvöll til þess að beina sjónum kjósenda frá því sem raunverulega máli skiptir – fjárhag Reykjavíkurborgar sem Helgi segir vera í rjúkandi rúst.
„Smjörklípa er vel þekkt aðferð í stjórnmálum. Í henni felst að í stað þess að ræða um lausnir á óþægilegu máli á opinberum vettvangi þyrlar valdhafi upp moldviðri um önnur mál í fjölmiðlum í því skyni að draga athygli almennings frá því máli sem valdhafanum er þungt í skauti,“ skrifar Helgi Áss í aðsendri grein á Vísi sem birtist nú í morgun.
Í greininni fullyrðir Helgi að Dagur borgarstjóri seti reglulega upp slíkar „leiksýningar“ ásamt upplýsingafulltrúum borgarinnar til þess að hafa áhrif á umræðuna um málefni borgarinnar.
„Þessi hópur setur upp reglubundnar leiksýningar til að reyna stýra opinberri umræðu um málefni Reykjavíkurborgar. Reykvískir skattgreiðendur borga svo brúsann af sýningarhaldinu,“ skrifar Helgi Áss.
Undir lok síðustu viku var greint frá þeim kröfum Isavia að Reykjavíkurborg myndi grípa til stórfelldrar grisjunnar á skóglendi í Öskjuhlíð til þess að tryggja flugöryggi. Helgi vill meina að tímasetning þeirra frétt sé engin tilviljun og að tilgangurinn hafi verið sá að kæfa umræðu um fjármál borgarinnar.
„Fjármál A-hluta Reykjavíkurborgar eru hægt og sígandi að verða rústir einar. Þótt núna sé langt liðið á ágúst er eingöngu vitað hvernig rekstur borgarinnar gekk fyrstu þrjá mánuði þessa árs. Það uppgjör var ekki fagurt. Verði reksturinn í álíka horfi út árið má reikna með að rekstrarhallinn í ár verði um 16 milljarðar króna. Nýlega var einnig upplýst að borgarsjóður hafi fullnýtt lánalínu sína (yfirdráttarheimild) hjá Íslandsbanka. Í því skyni að styrkja lausafjárstöðu sína hélt Reykjavíkurborg skuldabréfaútboð í síðustu viku. Fá tilboð bárust og voru þau metin það óhagstæð fyrir borgarsjóð að þeim var öllum hafnað. Sú ákvörðun var staðfest af borgarstjórnarmeirihlutanum á áðurnefndum borgarráðsfundi,“ skrifar Helgi Áss.
Segir hann að með öðrum orðum þá eigi Reykjavíkurborg erfitt með að fá lán á almennum markaði.
Umræðan í fjölmiðlum hafi þó eingöngu snúist um trjáfellingarnar í Öskjuhlíð og þar með hafi „smjörklípubeitan“, eins og Helgi Áss orðar það, virkað.
Bendir hann á að fyrst hafi verið minnst á grisjun skógar í Öskjuhlíð í samningi Reykjavíkurborgar við Icelandair Group árið 2013 og bréf Isavia hafi því verið lítið annað en áminning um að staðið yrði við gerða samninga og farið yrði eftir reglum sem tryggi eiga öryggi flugsamgangna. Bréfið hafi því ekki átt að koma borgarstjóra á óvart.
„Ekkert í lúðrablæstri Dags B .og hans blaðafulltrúa síðustu daga getur réttlætt að gera forráðamenn Isavia ohf. að grýlum gagnvart hagsmunum borgarbúa. Nema þá til að viðhalda óbeit borgarstjórans á tilvist Reykjavíkurflugvallar og henda inn í þjóðmálaumræðuna enn einni smjörklípunni svo að almenningur fengi ekki það á tilfinninguna í aðdraganda Menningarnætur að borgin væri á hausnum.“ skrifar Helgi Áss ennfremur
