Stefán Ólafsson, sérfræðingur í vinnumarkaðs- og lífskjararannsóknum hjá Eflingu, segir að svo virðist sem „menn hafi samið af sér í bullandi hagvexti, sem nálgast uppgripaárið 2007″ en með þessum ummælum vísar hann til kjarasamnings sem undirritaður var í dag af Samtökum Atvinnulífsins við VR, Landssamband íslenskra verslunarmanna og samflot tækni- og iðnaðarmanna.

Stefán spyr á Facebook hvort að fólk haldi að almenn launahækkun upp á 6,76 prósent í 9,4 prósenta verðbólgu, og með verðbólguspá upp á rúm 6 prósent fyrir næsta ár, sé viðunandi.

„Kaupmáttarrýrnun ársins 2022 verður þá ekki bætt og kaupmáttaraukning á næsta ári getur aldrei náð kaupmáttaraukningu Lífskjarasamningsins (sem var rúm 4% á ári fyrir verkafólk og að meðaltali 2% hjá öllu fullvinnandi fólki). Ef það verður kaupmáttaraukning á næsta ári þá verður hún að óbreyttu í kringum 0,5% að meðaltali) 

Stefán segir að menn hafi náð þessu fram með því að telja hagvaxtaraukann með í reikninginn. Bendir Stefán á að í reynd hafi löngu verið samið um þennan hagvaxtarauka, en með þeim samningum sem nú hafa verið undirritaðir hefur verið ákveðið að flýta þeirri hækkun svo hún taki strax gildi fremur en í maí á næsta ári.

„Menn hafa þá keypt hagvaxtaraukann tvisvar. Þetta telst vera nokkuð mikil nægjusemi… 

Svo virðist sem menn hafi samið af sér í bullandi hagvexti, sem nálgast uppgripaárið 2007.“