Iðnaðar- og verslunarmenn hafa skrifað undir kjarasamning við Samtök atvinnulífsins, en um er að ræða afrakstur af samfloti iðn- og tæknifólks, VR og Landssambandi íslenskra verslunarmanna. Líkt og kjarasamningurinn sem Starfsgreinasambandið gerði þá er um skammtímasamning að ræða sem mun gilda til 31. janúar 2024.

Samkvæmt fréttatilkynningu felur samningurinn í sér umtalsverðar kjarabætur. Frá á með nóvember á þessu ári hækka mánaðarlaun um 6,75 prósent en þó að hámarki um 66 þúsund krónur á mánuði. Hækkunin felur í sér flýtingu og fullar efndir hagvaxtarauka sem koma átti til greiðslu í maí á næsta ári.

Samhliða almennum launahækkunum hækka kauptaxtar og nýjar launatöflur taka gildi. Desember- og orlofsuppbætur hækka og verður desemberuppbót árið 2023 103 þúsund krónur og orlofsuppbót verður 56 þúsund krónur.

Í tilkynningu segir:

„Markmið samninganna er að styðja við kaupmátt launa auk þess að veita heimilum og fyrirtækjum fyrirsjáanleika á miklum óvissutímum. Samningurinn byggir undir stöðugleika og skapar forsendur fyrir langtímasamningi. Með áherslu á að verja kaupmátt í samningi til skamms tíma er það ásetningur samningsaðila að skapa fyrirjáanleika á miklum óvissutímum – fjölskyldum og fyrirtækjum til hagsbóta.“