Þar sem vorþing er á enda og sumarfrí Alþingis framundan þá standa yfir eldhúsdagsumræður á Alþingi. Er þeim sjónvarpað beint á RÚV að vanda.

Meðal þeirra þingmanna sem flytja ræðu í kvöld er Ingibjörg Isakesen sem talar fyrir Framsóknarflokkinn. Ingibjörg segir að nauðsynlegt sé að virkja meira. Segir hún að staðan í orkumálum þjóðarinnar hafi verið sér sérstaklega hugleikin. Forðast hafi verið að ræða orkumál og það hafi leitt til stöðnunar. Hún segir að það sé Alþingis að standa vaktina að ná kolefnishlutleysi. Það þurfi fjölbreyttar lausnir í orkumálum, nýjar virkjanir og styrking núverandi virkjana. Nauðsynlegt sé að gefa út ný virkjanaleyfi, því vernd og virkjun geti haldist í hendur.

Ingibjörg segir að nægar orkulindir séu á Íslandi sem hægt sé að að nýta í sátt við náttúruna, enda um græna orku að ræða. Segir hún ríkið stíga mikilvægt skref í að beisla vindorku meira en áður. Segir hún Íslendinga geta verið stolta af því hve hlutfall grænnar orku sé hátt hér. Mikil atvinnu- og uppbyggingartækifæri séu til staðar.

Ingibjörg segir að innrás Rússa í Úkraínu hafi ógnað fæðuöryggi. Verðhækkanir á aðföngum séu grafalvarlegt mál og geti leitt til þess að framboð á innlendri vöru dragist saman og að fæðuöryggi verði í hættu. Bregðast þurfi við þessu.