Dagur B. Eggertsson, borgarstjóri, fagnar á Facebook-síðu sinni fullnaðarsigri Reykjavíkurborgar í mikilvægu dómsmáli. Tilefnið er að Hæstiréttur felldi fyrr í dag dóm þar sem staðfestar voru heimildir borgarinnar til að gera samninga við byggingaraðila um þátttöku í innviðakostnaði en í samningunum fólst einnig forkaupsréttur borgarinnar á félagslegum íbúðum auk ákvæðis um hlutfall leiguíbúða á nýjum byggingarsvæðum.
„Samtök iðnaðarins hafa undanfarin misseri og ár haft uppi stór orð um þessa samninga og staðið á bak við málssóknir á öllum dómsstigum – og hafði borgin alls staðar sigur: í Héraðsdómi, Landsrétti og nú Hæstarétti,“ segir Dagur.
Afar mikið hafi því verið undir í þessum dómsmálum að mati borgarstjóra.
„Umræddir samningar hafa verið lykilverkfæri við að endurskipuleggja gömul athafnasvæði í Vogabyggð og Ártúnshöfða og þéttingarreiti mun víðar, fjölga félagslegum íbúðum um alla borg, tryggja félagslega blöndun á eftirsóttum byggingarsvæðum og auka gæði í hinu byggða umhverfi. Ég vil sérstaklega hrósa öllum sem hafa komið að málum þessum af borgarinnar hálfu.
