Miðað við fyrstu ársuppgjör stórra útgerðar- og fiskvinnslufyrirtækja þá var síðasta ár gott hjá þeim rekstrarlega. Benda tölurnar til að methagnaður hafi orðið í greininni.

Fréttablaðið skýrir frá þessu í dag. Fram kemur að Brim og Síldarvinnslan hafi hagnast um 22,6 milljarða samanlagt. Var hagnaður hvors fyrirtækis nánast hinn sami, eða um 11,3 milljarðar. Á fyrstu þremur mánuðum þessa árs hagnaðist Síldarvinnsla um rúmlega þrjá milljarða.

2020 greiddu öll sjávarútvegsfyrirtæki landsins 4,8 milljarða í veiðigjöld.

Í árslok 2020 var bókfært eigið fé íslensks sjávarútvegs 325 milljarðar. Reiknað er með að þessi eign vaxi enn frekar þegar næstu uppgjörstölur verða birtar.

Fréttablaðið hefur eftir Loga Einarssyni, formanni Samfylkingarinnar, að á meðan sjávarútvegsfyrirtækin skili methagnaði  sé ríkið sligað af skuldum vegna heimsfaraldursins og álögur á almenning fari vaxandi.

Svandís Svavarsdóttir, matvælaráðherra, sagði í Morgunblaðinu í gær að djúpstæð tilfinning væri meðal almennings um óréttlæti vegna samþjöppunar veiðiheimilda og að ágóðanum af hinni sameiginlegu auðlind, sem fiskurinn er, væri ekki skipt á réttlátan hátt.

Logi tók undir orð Svandísar og sagði að þjóðin horfi upp á gríðarlega auðsöfnun mjög fárra aðila  sem hafi leitt til þess að þeir ráði yfir þorra fiskveiðiheimilda og hafi í skjóli auðsins sölsað undir sig eignir í óskyldum greinum í samfélaginu.